ແນະນຳ ສນຊ (LFND)

ພິທີ ມອບ-ຮັບ ອາຄານອະນຸສອນສະຖານຫໍມູນເຊື້ອແນວລາວສ້າງຊາດ ເມືອງວຽງໄຊ

ໃນວັນທີ 14 ທັນວາ 2017, ທີ່ອະນຸສອນສະຖານຖ້ຳແນວລາວສ້າງຊາດ ເມືອງວຽງໄຊ ແຂວງຫົວພັນ ໄດ້ຈັດພິທີມອບ-ຮັບອາຄານອະນຸສອນສະຖານຫໍມູນເຊື້ອແນວລາວສ້າງຊາດ ເປັນກຽດກ່າວມອບໂດຍທ່ານ  ວົງທອນ ອິນຄາທອງພັດ ປະທານ ບໍລິສັດບຸນປະເສີດກໍ່ສ້າງຄົບວົງຈອນຈຳກັດ, ກ່າວຮັບໂດຍທ່ານ ຈັນທະວົງ ແສນອາມາດມົນຕີ ຮອງປະທານສູນກາງແນວລາວສ້າງຊາດ, ມີບັນດາທ່ານການນໍາຂອງແຂວງຫົວພັນ, ບັນດາປະທານແນວລາວສ້າງຊາດຂັ້ນແຂວງທົ່ວປະເທດ, ມີບັນດາທ່ານພະນັກງານ-ລັດຖະກອນ ສູນກາງແນວລາວສ້າງຊາດ, ແນວລາວສ້າງຊາດນະຄອນຫຼວງ ແລະ ບັນດາແຂວງທົ່ວປະເທດ ເຂົ້າຮ່ວມ.

ທ່ານ ຄຳ ໂຮມມີໄຊ ຮອງເລຂາພັກເມືອງ ປະທານແນວລາວສ້າງຊາດເມືອງວຽງໄຊ ໄດ້ຫວນຄືນປະຫວັດຄວາມເປັນມາຂອງຖ້ຳແນວລາວສ້າງຊາດໂດຍສັງເຂບ ເປັນຕົ້ນທ່ານໄດ້ຍົກໃຫ້ເຫັນວ່າ: ໃນປີ 1964 ລັດທິລ່າເມືອງຂຶ້ນແບບໃໝ່ ໄດ້ສຸມທຸກກໍາລັງບຸກຕີ 2 ແຂວງເຕົ້າໂຮມຢ່າງໜັກໜວງ, ໄດ້ໃຊ້ການບຸກໂຈມຕີທາງອາກາດ ເຂົ້າເຂດທີ່ໝັ້ນຢູ່ຊຳເໜືອຢ່າງໜັກໜ່ວງ, ຕໍ່ສະພາບການດັ່ງກ່າວ ການນຳແນວລາວອິດສະຫຼະ ຈິ່ງໄດ້ໃຊ້ຖ້ຳຜາຫີນ ເພື່ອເປັນບ່ອນກຳບັງລູກບົ່ມ ຂອງໂຈນອາກາດລັດທິລ່າເມືອງຂຶ້ນແບບໃໝ່, ບັນດາທ່ານຜູ້ນຳຈິ່ງໄດ້ເລືອກເອົາສະຖານທີ່ທົ່ງນາໄກ່ ເປັນເຂດທີ່ໝັ້ນຂອງການປະຕິວັດຢູ່ໃນຖ້ຳ ເພື່ອບັນຊາການຕໍ່ສູ້ປົດປ່ອຍປະເທດຊາດ ໃນນັ້ນຫ້ອງວ່າການສູນກາງແນວລາວຮັກຊາດ ກໍ່ໄດ້ມາຊອກພົບສະຖານທີ່ແຫ່ງນີ້ ເປັນຫ້ອງວ່າການສູນກາງແນວລາວຮັກຊາດ ເພື່ອປຸກລະດົມທຸກຊັ້ນຄົນ, ທຸກເພດ-ທຸກໄວ ໃນຂອບເຂດທົ່ວປະເທດ ນັບທັງເຂດຄວບຄຸມ ຂອງສັດຕູເຂົ້າມາຮ່ວມແນວລາວຮັກຊາດ ເພື່ອຕີເອົາຊະນະລັດທິລ່າເມືອງຂຶ້ນແບບໃໝ່, ການປົດປ່ອຍທົ່ວປະເທດດ້ວຍສາມບາດຄ້ອນຍຸດທະສາດ, ຢຶດອຳນາດແບບ “ບົວບໍ່ຊ້ຳນ້ຳບໍ່ຂຸ່ນ” ແລະ ສ້າງຕັ້ງລະບອບປະຊາທິປະໄຕ ປະຊາຊົນ ໃນວັນທີ 2 ທັນວາ 1975. ພ້ອມກັນນີ້ ໄດ້ຮັບຟັງການລາຍງານແຜນການການດໍາເນີນໂຄງການຮັບເໝົາການກໍ່ສ້າງອະນຸສອນສະຖານ, ໄດ້ກໍ່ສ້າງຮົ້ວກຳແພງ, ກໍ່ສ້າງຕ້ານກັ່ນເຈື່ອນສຳເລັດ, ກໍ່ສ້າງຫໍມູນເຊື້ອສຳເລັດ ລວມທັງໝົດເປັນມູນຄ່າ 4,998,000,000 ກີບ (ສີ່ຕື້ເກົ້າຮ້ອຍເກົ້າສິບແປດລ້ານກີບ)

ໂອກາດນີ້, ທ່ານ ຮອງປະທານ ສນຊ ກໍໄດ້ກ່າວມອບຕໍ່ໃຫ້ແນວລາວສ້າງຊາດແຂວງຫົວພັນ ແລະ ແນວລາວສ້າງຊາດເມືອງວຽງໄຊ ເປັນຜູ້ອະນຸລັກຮັກສາໄວ້ໃຫ້ຍືນຍາວນານ, ເປັນສະຖານທີ່ທາງປະຫວັດສາດ,ເປັນບ່ອນທ່ອງທ່ຽວໃຫ້ນັກທ່ອງທ່ຽວທັງພາຍໃນ ແລະ ຕ່າງປະເທດ; ໃຫ້ປະຊາຊົນລາວບັນດາເຜົ່າ, ນັກຮຽນຮູ້ປັນຍາຊົນ ແລະ ນັກຮຽນ-ນັກສຶກສາໄດ້ເຂົ້າມາທັດສະນະສຶກສາ, ຄົ້ນຄວ້າຮ່ຳຮຽນມູນເຊື້ອການເຄື່ອນໄຫວຂອງແນວລາວອິດສະຫຼະ, ແນວລາວຮັກຊາດ ແລະ ແນວລາວສ້າງຊາດ ໃນປະຈຸບັນ. ພ້ອມກັນນີ້ ກໍໄດ້ປະດັບປະດາເຮັດກອງທານບຸນກຸສົນອຸທິດວິນຍານໃຫ້ແກ່ບັນດາທ່ານການນຳແນວລາວອິດສະຫຼະ, ແນວລາວຮັກຊາດ ທີ່ມີຜົນງານອັນພົ້ນເດັ່ນໃນການປະຕິວັດຊາດ 14 ທ່ານ ແລະ ບັນດາທ່ານພະນັກງານ-ລັດຖະກອນ,ທະຫານ, ຕຳຫຼວດ ທີ່ໄດ້ເສຍສະຫຼະ ເພື່ອການປະຕິວັດຊາດໃນແຕ່ລະໄລຍະຜ່ານມາ. ພ້ອມທັງໄດ້ຮັບຊົມການສະແດງສີລະປະ-ວັນນະຄະດີພື້ນເມືອງປະເພດຕ່າງໆ ຕື່ມອີກ.

2017-12-22

ປະຕິທິນ

Jan-2020
S M T W T F S
1 2 3 4
5 6 7 8 9 10 11
12 13 14 15 16 17 18
19 20 21 22 23 24 25
26 27 28 29 30 31

ລິຂະສິດ © 2015
ອົງການແນວລາວສ້າງຊາດສະຫງວນລິຂະສິດໄວ້ທັງໜົດ