ແນະນຳ ສນຊ (LFND)

ປະທານສູນກາງແນວລາວສ້າງຊາດ ໂອ້ລົມຕໍ່ກອງປະຊຸມຄົບຄະນະຄະນະກໍາມະການ ສູນກາງ ອພສ

      ທ່ານ ໄຊສົມພອນ ພົມວິຫານ ກໍາມະການກົມການເມືອງສູນກາງພັກ ປະທານສູນກາງແນວລາວສ້າງຊາດ ເປັນກຽດໂອ້ລົມຕໍ່ກອງປະຊຸມຄົບ ຄະນະກໍາມະການ ສູນກາງອົງການພຸດທະສາສະໜາສຳພັນລາວ (ອພສ) ເຊິ່ງມີ ພະອາຈານມະຫາ ງອນ ດໍາລົງບຸນ ປະທານສູນກາງ ອພສ, ທ່ານ ທອງຈັນ ຮອງລັດຖະມົນຕີກະຊວງພາຍໃນ ຜູ້ຊີ້ນໍາວຽກງານຊົນເຜົ່າ ແລະ ສາສະໜາ ພ້ອມດ້ວຍພະສົງ-ສາມະເນນ ແລະ ພາກສ່ວນທີ່ກ່ຽວຂ້ອງເຂົ້າຮ່ວມ ທີ່ຫໍທໍາມະສະພາ ໃນວັນທີ 20 ທັນວາ 2017

      ໂອກາດໂອ້ລົມໃນຄັ້ງນີ້ ທ່ານປະທານສູນກາງແນວລາວສ້າງຊາດ ໄດ້ໃຫ້ຮູ້ວ່າ ອົງການພຸດທະສາສະ  ໜາສໍາພັນລາວ ເປັນອົງການພາຄີໜຶ່ງຂອງອົງການແນວລາວສ້າງຊາດ ແລະ ມີມູນເຊື້ອພົວພັນປະສານສົມທົບກັນມາແຕ່ສະໄໝຕໍ່ສູ້ກູ້ຊາດ, ອົງການພຸດທະສາສະໜາ ກໍຄືພະສົງລາວໄດ້ປະກອບສ່ວນຢ່າງຕັ້ງໜ້າໃນພາລະ ກິດປົກປັກຮັກສາ ແລະ ສ້າງສາພັດທະນາປະເທດຊາດ, ໂດຍສະເພາະມີບົດບາດສໍາຄັນໃນການເຕົ້າໂຮມຄວາມສາມັກຄີບັນດາພະສົງ, ມີບົດບາດໃນການສຶກສາອົບຮົມປະຊາຊົນລາວບັນດາເຜົ່າ ໃຫ້ເປັນພົນລະເມືອງດີຂອງຊາດ, ມີນ້ຳໃຈຮັກເຊື້ອແພງຊາດ, ຮັກບ້ານເກີດເມືອງນອນ ແລະ ຮັກລະບອບໃໝ່; ນອກຈາກນັ້ນ, ພະ ສົງ-ສາມະເນນ ຍັງເປັນແບບຢ່າງໃນການອະນຸລັກຮັກສາຮີດຄອງປະເພນີ-ວັດທະນະທໍາອັນດີງາມ ທີ່ເປັນເອກະລັກຂອງຊາດ ແລະ ເປັນແບບຢ່າງໃນການຊ່ວຍເຫຼືອສັງຄົມ.

      ເພື່ອເສີມຂະຫຍາຍ ແລະ ຮັກສາໄດ້ມູນເຊື້ອອັນດີງາມ, ຜົນງານທີ່ພົ້ນເດັ່ນ ແລະ ຮັກສາໄດ້ບົດບາດການນໍາພາຂອງພະສົງ,​ ຄວາມເຫຼື້ອມໃສສັດທາ ຂອງພຸດທະສາສະນິກກະຊົນນັ້ນ ທ່ານປະທານສູນກາງແນວລາວສ້າງຊາດໄດ້ມີບາງຄໍາເຫັນ ເນັ້ນຕື່ມວ່າ: ສືບຕໍ່ເພີ່ມທະວີຄວາມສາມັກຄີພາຍໃນບັນດາພະສົງ-ສາມະເນນ ໃຫ້ມີຄວາມໜັກແໜ້ນ ຍົກສູງສະຕິຊາດ ເຄົາລົບພະທໍາມະວິໄນຢ່າງເຄັ່ງຄັດ ເຄື່ອນໄຫວໃຫ້ສອດຄ່ອງກັບລະ ບຽບການບ້ານເມືອງ ແລະ ດໍາລັດ 315 ວ່າດ້ວຍການຄຸ້ມຄອງ ແລະ ປົກປ້ອງການເຄື່ອນໄຫວສາສະໜາຂອງລັດຖະບານ. ພ້ອມນັ້ນ, ໃຫ້ພາກສ່ວນທີ່ກ່ຽວຂ້ອງ ພິຈາລະນາປັບປຸງບາງເນື້ອໃນໃຫ້ເໝາະສົມ ແລະ ສອດ ຄ່ອງກັບດໍາລັດດັ່ງກ່າວ; ການເຄື່ອນໄຫວຂອງບັນດາກໍາມາທິການຕ່າງໆຂອງ ອພສ ຄວນສືບຕໍ່ຍົກສູງວຽກງານເສນາທິການຕື່ມ; ຂໍໃຫ້ບັນດາການນໍາສົງຂັ້ນສູນກາງ ແລະ ປະທານ ອພສ ແຕ່ລະແຂວງ ໃຫ້ເພີ່ມທະວີເອົາໃຈໃສ່ຊີ້ນໍາ ໃຫ້ພະສົງ-ສາມະເນ ເພີ່ມທະວີສະຕິລະວັງຕົວ,​ ຊ່ວຍຕິດຕາມການເຄື່ອນໄຫວ ຂອງກຸ່ມຄົນທີ່ບໍ່ຫວັງດີ ທີ່ສວຍໃຊ້ສາສະໜາ ເພື່ອເຄື່ອນໄຫວແບ່ງແຍກຄວາມສາມັກຄີພາຍໃນ, ເອົາໃຈໃສ່ໃຫ້ມີການພົວພັນກັນຢ່າງໃກ້ຊິດ ລະຫວ່າງບ້ານກັບວັດ ແລະ ຕ້ອງເພີ່ມທະວີຄວາມສາມັກຄີ ພ້ອມກັນສ້າງສາພັດທະນາ ເພື່ອຄວາມຈົບງາມຂອງບ້ານເມືອງ ແລະ ພ້ອມກັນແກ້ໄຂບັນຫາເລັກໆນ້ອຍໆທີ່ເກີດຂຶ້ນພາຍໃນວັດໃຫ້ຕົກໄປ; ຫຼີກລ້ຽງການນໍາໃຊ້ວັດວາອາຮາມ ເປັນບ່ອນເຄື່ອນໄຫວບໍ່ຖືກຕ້ອງກັບພະທໍາວິໄນ ແລະ ກົດລະບຽບບ້ານເມືອງ ເຊິ່ງຈະພາໃຫ້ຂາດສັດທາ ແລະ ຄວາມເຊື່ອຖືຂອງປະຊາຊົນ ທັງຍັງເປັນຊ່ອງຫວ່າງໃຫ້ອິດທິກໍາລັງປໍລະປັກໃສ່ຮ້າຍປ້າຍສີ; ຂໍໃຫ້ເພີ່ມທະວີຄວາມສາມັກຄີຮ່ວມມືກັບອົງການພຸດທະສາສະໜາ ຂອງປະເທດເພື່ອນມິດຍຸດທະສາດ ແລະ ຊາວພຸດປະເທດອື່ນໆ ເພື່ອເສີມຂະຫຍາຍສາຍພົວພັນກັບຕ່າງປະເທດ ຕາມແນວທາງນະໂຍບາຍຂອງພັກ, ອອກແຮງປຸກລະດົມຄົນເຊື້ອສາຍລາວ ທີ່ທໍາມາຫາກິນຢູ່ຕ່າງປະເທດ ກໍຄືພະສົງລາວຢູ່ຕ່າງປະເທດ ໃຫ້ມີສ່ວນຮ່ວມໃນການສ້າງສາ ແລະ ພັດທະນາປະເທດຊາດ ໃຫ້ຫຼຸດພົ້ນອອກຈາກຄວາມທຸກຍາກ.

2017-12-22

ປະຕິທິນ

Jan-2020
S M T W T F S
1 2 3 4
5 6 7 8 9 10 11
12 13 14 15 16 17 18
19 20 21 22 23 24 25
26 27 28 29 30 31

ລິຂະສິດ © 2015
ອົງການແນວລາວສ້າງຊາດສະຫງວນລິຂະສິດໄວ້ທັງໜົດ