ແນະນຳ ສນຊ (LFND)

ສູນກາງແນວລາວສ້າງຊາດ ແລະ ກຸ່ມ ບໍລິສັດ ພົງສະຫວັນ ຈໍາກັດ ປະຕິບັດໂຄງການຮ່ວມມື

          ພິທີເຊັນບົດບັນທຶກຊ່ວຍຈໍາ ລະຫວ່າງ ສູນກາງແນວລາວສ້າງຊາດ ແລະ ກຸ່ມບໍລິສັດ ພົງສະຫວັນ ຈໍາກັດ ກ່ຽວກັນການຮ່ວມມືຈັດຕັ້ງປະຕິບັດໂຄງການ “ສ້າງຄອບຄົວ ແລະ ບ້ານສາມັກຄີປອງດອງ ຕິດພັນກັບການແກ້ໄຂຄວາມທຸກຍາກຂອງປະຊາຊົນບັນດາເຜົ່າ” ໄດ້ຈັດຂຶ້ນໃນວັນທີ 26 ທັນວາ 2017 ທີ່ສູນກາງແນວລາວສ້າງຊາດ.

ໂດຍເປັນກຽດເຂົ້າຮ່ວມຂອງ ທ່ານ ປອ ໄຊສົມພອນ ພົມວິຫານ ກໍາມະການກົມການເມືອງສູນກາງພັກ, ປະທານສູນກາງແນວລາວສ້າງຊາດ, ມີບັນດາທ່ານຄະນະນໍາສູນກາງແນວລາວສ້າງຊາດ ແລະ ຄະນະຜູ້ບໍລິຫານ ກຸ່ມບໍລິສັດ ພົງສະຫວັນ ຈໍາກັດ, ມີບັນດາທ່ານທີ່ຕາງໜ້າຈາກອົງການຈັດຕັ້ງມະຫາຊົນຂັ້ນສູນກາງ, ອົງການປົກຄອງແຂວງໄຊສົມບູນ ພ້ອມດ້ວຍແຂກຖືກເຊີນ ແລະ ພາກສ່ວນທີ່ກ່ຽວຂ້ອງຂອງທັງສອງຝ່າຍເຂົ້າຮ່ວມເປັນສັກຂີພິຍານ;

          ພິທີເຊັນບົດບັນທຶກຄັ້ງນີ້ ໂດຍມີ ທ່ານ ນ ຄໍາຈັນ ພົມແສງສະຫວັນ ຮອງປະທານ ສູນກາງແນວລາວສ້າງຊາດ, ທ່ານ ພົນໂທ ໄອ່ ສຸລິຍະແສງ ປະທານ ກຸ່ມບໍລິສັດ ພົງສະຫວັນ ຈໍາກັດ ແລະ ທ່ານ ເລັ່ງຊົງ ຕົ່ງສີ ປະທານແນວລາວສ້າງຊາດ ແຂວງ ໄຊສົມບູນ ຮ່ວມລົງນາມໃນບົດບັນທຶກດັ່ງກ່າວ;

          ການສ້າງຄອບຄົວ ແລະ ບ້ານສາມັກຄີປອງດອງຂອງແນວລາວສ້າງຊາດ ແມ່ນໜຶ່ງໃນມາດຕະຖານສ້າງຄອບຄົວ ແລະ ບ້ານພັດທະນາຂອງລັດຖະບານ ຕິດພັນກັບຂະບວນການແຂ່ງຂັນຮັກຊາດ ແລະ ພັດທະນາ ຕາມທິດ 3 ສ້າງ; ການສ້າງຄອບຄົວ ແລະ ບ້ານສາມັກຄີປອງດອງ ຕິດພັນກັບການແກ້ໄຂຄວາມທຸກຍາກຂອງປະຊາຊົນບັນດາເຜົ່າ ແມ່ນການຈັດຕັ້ງຜັນຂະຫຍາຍມະຕິກອງປະຊຸມໃຫຍ່ ຄັ້ງທີ X ຂອງພັກ, ແຜນພັດທະນາເສດຖະກິດ-ສັງຄົມ ຄັ້ງທີ VIII ແລະ ມະຕິກອງປະຊຸມໃຫຍ່ຜູ້ແທນທົ່ວປະເທດ ຄັ້ງທີ X ຂອງແນວລາວສ້າງຊາດ ລົງສູ່ທ້ອງຖິ່ນຮາກຖານຕົວຈິງ; ເປັນການປຸກລະດົມກໍາລັງແຮງທົ່ວປວງຊົນ ເຂົ້າຮ່ວມຈັດຕັ້ງປະຕິບັດສອງໜ້າທີ່ຍຸດທະສາດຄື: ປົກປັກຮັກສາ ແລະ ສ້າງສາພັດທະນາປະເທດຊາດ; ເພີ່ມທະວີຄວາມສາມັກຄີ, ຄວາມເປັນເອກະພາບຂອງປະຊາຊົນບັນດາເຜົ່າ ເຂົ້າໃນການແກ້ໄຂຄວາມທຸກຍາກ ໂດຍເລີ່ມຈາກຄອບຄົວ ແລະ ຮາກຖານບ້ານ ເຊິ່ງແມ່ນມູນເຊື້ອ ແລະ ເປັນປັດໄຈສໍາຄັນໃນການສ້າງສະຖຽນລະພາບ, ຄວາມສະຫງົບ ແລະ ຄວາມມັ່ງຄັ່ງ ເຂັ້ມແຂງຂອງປະເທດ.

ການເຊັນບົດບັນທຶກຊ່ວຍຈຳຄັ້ງນີ້, ສອງຝ່າຍ ຈະຮ່ວມສ້າງແຜນດໍາເນີນງານ, ບົດສະເໜີໂຄງການ ແລະ ຈັດຕັ້ງປະຕິບັດໂຄງການ ສ້າງຄອບຄົວ ແລະ ບ້ານສາມັກຄີປອງດອງຕິດພັນກັບການແກ້ໄຂຄວາມທຸກຍາກ ໃນຂອບເຂດທົ່ວປະເທດ, ໂດຍກໍານົດເອົາຈຸດສຸມໂພນສະອາດ ເມືອງ ລ້ອງຊານ ແຂວງໄຊສົມບູນ ເປັນຈຸດທົດລອງສ້າງເປັນຕົວແບບໃນການຮຽນຮູ້ ແລະ ຖອດຖອນບົດຮຽນ,​ໄລຍະເວລາ 03 ປີ (2018-2020); ສອງຝ່າຍ ຈະຮ່ວມມືແລກປ່ຽນຂໍ້ມູນຂ່າວສານ, ຄົ້ນຄວ້າ, ວິເຄາະ-ວິໄຈ ທາງດ້ານວິຊາການໃນວຽກງານດັ່ງກ່າວ ເພື່ອເຫັນໄດ້ທາງດ້ານທ່າແຮງ ແລະ ສິ່ງທ້າທາຍ ນັບທັງຂໍ້ສະດວກ, ຂໍ້ຫຍຸ້ງຍາກ ແລະ ບົດຮຽນທີ່ສາມາດຖອດຖອນໄດ້ຈາກພຶດຕິກໍາຕົວຈິງ; ສອງຝ່າຍ ຕົກລົງ ແບ່ງຄວາມຮັບຜິດຊອບລະຫວ່າງ ສູນກາງແນວລາວສ້າງຊາດ,​ ກຸ່ມບໍລິສັດ ພົງສະຫວັນ ຈໍາກັດ ແລະ ແນວລາວສ້າງຊາດ ທ້ອງຖິ່ນ; ສອງຝ່າຍ ຈະແຕ່ງຕັ້ງຄະນະຊີ້ນໍາ, ຄະນະຮັບຜິດຊອບ ປະຕິບັດງານຮ່ວມກັນ ເພື່ອວາງໂຄງການ-ກິດຈະກໍາ, ​ການຈັດຕັ້ງປະຕິບັດ, ຕິດຕາມ-ກວດກາ ແລະ ປະເມີນຜົນໂຄງການໃນແຕ່ລະໄລຍະ, ຄະນະຮັບຜິດຊອບ ທີ່ໄດ້ຮັບການແຕ່ງຕັ້ງຂອງສອງຝ່າຍ ຕ້ອງສ້າງກົນໄກການພົວພັນຮ່ວມມືສອງຝ່າຍ ຫຼື ຫຼາຍຝ່າຍໃນໄລຍະສັ້ນ ແລະ ໄລຍະຍາວ ເພື່ອສະເໜີຜ່ານການຮັບຮອງຂອງສອງຝ່າຍໃນແຕ່ລະໄລຍະ

 

2017-12-27

ປະຕິທິນ

Jan-2020
S M T W T F S
1 2 3 4
5 6 7 8 9 10 11
12 13 14 15 16 17 18
19 20 21 22 23 24 25
26 27 28 29 30 31

ລິຂະສິດ © 2015
ອົງການແນວລາວສ້າງຊາດສະຫງວນລິຂະສິດໄວ້ທັງໜົດ