ແນະນຳ ສນຊ (LFND)

ທ່ານ ຮອງປະທານສູນກາງແນວລາວສ້າງຊາດ ເຂົ້າຮ່ວມງານສົ່ງທ້າຍປີເກົ່າ ຕ້ອນຮັບປີໃໝ່ ຂອງສູນລວມຄຣິດຕະຈັກ ຂ່າວປະເສີດ ສປປ ລາວ

ທ່ານ ຄໍາໃບ ດໍາລັດ ກໍາມະການສູນກາງພັກ, ຮອງປະທານສູນກາງແນວລາວສ້າງຊາດ (ສນຊ) ໄດ້ເຂົ້າຮ່ວມງານສົ່ງທ້າຍປີເກົ່າ ຄສ 2017 ຕ້ອນຮັບປີໃໝ່ ຄສ 2018 ທີ່ໂບດນາໄຊ ໃນວັນທີ 31 ທັນວາ 2017 ນີ້,  ໂດຍມີທ່ານ ສຈ. ດຣ ຄໍາພອນ ກຸນທະປັນຍາ ສັງຄະລາດຄຮີສຕະຈັກຂ່າວປະເສີດ, ປະທານບໍລິຫານສູນລວມຄຣີສຕະຈັກຂ່າວປະເສີດ ສປປ ລາວ ມີບັນດາທ່ານຜູ້ຕາງໜ້າຈາກສະພາແຫ່ງຊາດ, ແນວລາວສ້າງຊາດ, ກະຊວງພາຍໃນ ແລະ ບັນດາຜູ້ຕາງໜ້າຈາກສາສະໜາຕ່າງໆພ້ອມດ້ວຍສະມາຊິກສາສະໜາຄຣິສຕະຈັກຂ່າວປະເສີດເຂົ້າຮ່ວມ.

ໃນພິທີຄັ້ງນີ້, ທ່ານ ສຈ. ດຣ ຄໍາພອນ ກຸນທະປັນຍາ ປະທານບໍລິຫານສູນລວມຄຣີສຕະຈັກຂ່າວ ໄດ້ສະຫຼຸບລາຍງານຜົນງານໃນໜຶ່ງປີຜ່ານມາ ຊຶ່ງທາງສູນລວມໄດ້ເອົາໃຈໃສ່ໃນການຝຶກອົບຮົມສັ່ງສອນ, ເທດສະໜາທໍາໃຫ້ສະມາ ຊິກຊາວສາສະໜາເຢຊູຄຣີດເຈົ້າ, ເພື່ອໃຫ້ປະຕິບັດຕາມຫຼັກຄໍາສອນຂອງອົງພຣະຜູ້ເປັນເຈົ້າຢ່າງຖືກຕ້ອງ ແລະ ປະຕິບັດຕາມລະບຽບກົດໝາຍບ້ານເມືອງ ຊຶ່ງໃນໄລຍະໜຶ່ງປີຜ່ານມາສູນລວມຄຣິສຕະຈັກຂ່າວປະເສີດໄດ້ປະກອບສ່ວນຊ່ວຍ ເຫຼືອສັງຄົມຫຼາຍດ້ານຄື: ຊ່ວຍເຫຼືອທັງດ້ານວັດຖຸ-ອຸປະກອນ, ຊ່ວຍເຫຼືອທາງດ້ານເຫື່ອແຮງ-ສະຕິປັນຍາ ເຊິ່ງການຊ່ວຍ ເຫຼືອນັ້ນເປັນສ່ວນໜຶ່ງໃນການປະກອບສ່ວນລົບລ້າງຄວາມທຸກຍາກຂອງປະຊາຊົນລາວບັນດາເຜົ່າ.

ໃນໂອກາດນີ້, ທ່ານ ຮອງປະທານ ສນຊ ໄດ້ໂອ້ລົມຕື່ມວ່າ: ໃນທ່າມກາງບັນຍາກາດທີ່ທົ່ວພັກ, ທົ່ວກອງທັບ ແລະ ທົ່ວປວງຊົນທັງຊາດ ກໍາລັງເບີກບານມ່ວນຊື່ນກັບຜົນສໍາເລັດແຫ່ງການສະເຫຼີມສະຫຼອງວັນຊາດ ວັນທີ 2 ທັນວາ ຄົບຮອບ 42 ປີ, ນອກຈາກນີ້, ປວງຊົນທັງຊາດກໍາລັງຂຸ້ນຂ້ຽວແຂ່ງຂັນກັນ ສ້າງຂະບວນການຈັດຕັ້ງປະຕິບັດມະຕິກອງປະຊຸມໃຫຍ່ຄັ້ງທີ X ຂອງພັກ ແລະ ມະຕິກອງປະຊຸມໃຫຍ່ຜູ້ແທນທົ່ວປະເທດຄັ້ງທີ X ຂອງແນວລາວສ້າງຊາດ ພວກເຮົາມາຊຸມນຸມກັນໃນມື້ນີ້ ເພື່ອເປັນການສະເຫຼີມສະຫຼອງວັນປີໃໝ່ສາກົນ ປະຈໍາ 2018 ນີ້, ຂ້າພະເຈົ້າໃນນາມຕາງໜ້າຄະນະປະຈໍາ ສນຊ ກໍຄືການຈັດຕັ້ງ ແລະ ໃນນາມສ່ວນຕົວ ຂ້າພະເຈົ້າມີຄວາມດີອົກດີໃຈ ທີ່ໄດ້ເຫັນປະຊາຊົນລາວບັນດາເຜົ່າ ມີຄວາມເບິກບານມ່ວນຊື່ນ, ມີຄວາມສາມັກຄີປອງດອງເປັນປຶກແຜ່ນແໜ້ນໜາ ແລະ ພ້ອມກັນເສີມຂະຫຍາຍຮີດຄອງປະເພນີອັນດີງານຂອງຊາດກໍ່ຄືຂອງປະຊາຊົນລາວບັນດາເຜົ່າ ເຊິ່ງເປັນເອກະລັກສະເພາະຂອງເຜົ່າຕົນເອງ, ປະເທດລາວຂອງພວກເຮົາມີຫຼາຍຊົນເຜົ່າ, ຫຼາຍຄວາມເຊື່ອ, ຫຼາຍຮີດຄອງປະເພນີ ແລະ ຫຼາຍວິຖີການດໍາລົງຊີວິດ ແຕ່ພວກເຮົາກໍຢູ່ຮ່ວມກັນດ້ວຍຄວາມສະຫງົບສຸກບໍ່ມີການແບ່ງແຍກຊົນເຜົ່າ ແລະ ທ່ານ ຍັງໄດ້ເນັ້ນໜັກໃຫ້ທຸກເຜົ່າ ທຸກສາສະໜາ ຈົ່ງພ້ອມກັນເປັນເຈົ້າການ ໃນການສຶກສາອົບຮົມການເມືອງແນວຄິດ, ປຸກລະດົມ ຂົນຂວາຍໃຫ້ບັນດາສາສະໜາເຂົ້າຮ່ວມຂະບວນການຕ່າງໆຂອງຊາດ ເພື່ອເຮັດໃຫ້ສັງຄົມມີຄວາມສາມັກຄີປອງດອງກັນ ແລະ ຍັງໄດ້ຮຽກຮ້ອງໃຫ້ບັນດາສາສະໜາຕ່າງໆ ພ້ອມກັນເຄື່ອນໄຫວໃຫ້ຖືກຕ້ອງສອດຄ່ອງຕາມແນວທາງນະໂຍບາຍຂອງພັກ, ລະບຽບກົດ   ໝາຍຂອງລັດ ຈົ່ງຊ່ວຍກັນເອົາໃຈໃສ່ມີສະຕິລະວັງຕົວຕໍ່ການເຄື່ອນໄຫວ ຂອງກຸ່ມຄົນບໍ່ຫວັງດີສວຍໃຊ້ ສາສະໜາ-ເຜົ່າ ເພື່ອແບ່ງແຍກຄວາມສາມັກຄີພາຍໃນ. ພ້ອມກັນນີ້, ຍັງໄດ້ຮັບຊົມການສະແດງສິລະປະ-ວັນນະຄະດີ ຕື່ມອີກ.   

                 

2018-01-02

ປະຕິທິນ

Jan-2020
S M T W T F S
1 2 3 4
5 6 7 8 9 10 11
12 13 14 15 16 17 18
19 20 21 22 23 24 25
26 27 28 29 30 31

ລິຂະສິດ © 2015
ອົງການແນວລາວສ້າງຊາດສະຫງວນລິຂະສິດໄວ້ທັງໜົດ