ແນະນຳ ສນຊ (LFND)

ທ່ານ ຮອງປະທານ ສນຊ ເຂົ້າຮ່ວມພິທີເປີດຫໍຫຼັກເມືອງ ແຂວງຄຳມ່ວນ

ໃນວັນທີ 29-30 ທັນວາ 2017 ນີ້, ທ່ານ ນາງ ຍອດແກ້ວມະນີ ສຸພານຸວົງ ຮອງປະທານສູນກາງແນວລາວສ້າງຊາດ (ສນຊ), ກໍາມະການ(ສນຊ) ພ້ອມດ້ວຍຄະນະ ໄດ້ເຄື່ອນໄຫວຢ້ຽມຢາມ ແລະ ເຂົ້າຮ່ວມພິທີເປີດຫໍຫຼັກເມືອງ ຢູ່ວັດນາໂບ ບ້ານນາໂບ ເມືອງທ່າແຂກ ແຂວງຄຳມ່ວນ

ໂດຍການຕ້ອນຮັບຢ່າງອົບອຸ່ນຂອງທ່ານ ໂອໄດ ສຸດາພອນ ກຳມະການສູນກາງພັກ ເລຂາພັກແຂວງ ເຈົ້າແຂວງຄຳມ່ວນ ແລະ ທ່ານ ແສງທອງ ພະຄຸນທອງ ຄະນະປະຈຳພັກແຂວງ, ປະທານແນວລາວສ້າງຊາດ ແຂວງຄຳມ່ວນ  ພ້ອມດ້ວຍບັນດາທ່ານການນຳຂອງແຂວງ, ເມືອງ ແລະ ບັນດາທ່ານການນໍາຂອງອົງການຈັດຕັ້ງມະຫາຊົນແຂວງ ແລະ ເມືອງທ່າແຂກ.

ໃນພິທີ ກໍໄດ້ຮັບຟັງການລາຍງານໂຄງການກໍ່ສ້າງຫໍຫຼັກເມືອງໂດຍຫຍໍ້ ເຊິ່ງໄດ້ໃຫ້ຮູ້ວ່າ:ຫໍຫຼັກເມືອງມີຂະໜາດກວ້າງ 6 ແມັດ, ສູງຈາກໜ້າດີນເຖິງຈອມຍອດຊໍ່ຟ້າ 15 ແມັດ, ໂຄງການກໍ່ສ້າງດ້ວຍເບຕົງເສີມເຫຼັກຢ່າງແໜ້ນໜາ; ເສົາຫຼັກເມືອງທີ່ສ້າງຂຶ້ນມີຂະໜາດກວ້າງ 41 ຊັງຕີແມັດ, ສູງ 169 ຊັງຕີແມັດ, ຄວັດແກະສະຫຼັກດ້ວຍໄມ້ແກ່ນຈັນຫອມ; ພ້ອມນັ້ນ ຄະນະຮັບຜິດຊອບການກໍ່ສ້າງຫໍຫຼັກເມືອງຂັ້ນສູນກາງ ກໍໄດ້ມອບພະພຸດທະຮູບ ປາງມານວິໄຊ ເຮັດດ້ວຍເນື້ອໄມ້ແກ່ນຈັນຫອມ ເຊິ່ງທັງເສົາຫຼັກເມືອງ ແລະ ພະພຸດທະຮູບ ປາງມານວິໄຊ ແມ່ນໄດ້ນຳໄປຕັ້ງສະຖິດໄວ້ຢູ່ຫໍຫຼັກເມືອງນຳກັນ. ພ້ອມກັນນີ້ ກໍໄດ້ແຫ່ເສົາຫຼັກເມືອງ ແລະ ພະພຸດທະຮູບຂຶ້ນມາປະດິດສະຖານຢູ່ຫໍຫຼັກເມືອງ, ຈູດທຽນໄຊ, ລັ່ນຄ້ອງເປີດພິທີການນຳໃຊ້ຢ່າງເປັນທາງການ, ດຳເນີນພິທີສູດປະລິຕະມຸງຄຸນ ແລະ ຕັກບາດຖວາຍສັງຄະທານແດ່ພະສົງ.

ພິທີເປີດຫໍຫຼັກເມືອງນີ້ ແມ່ນເພື່ອເປັນການສືບຕໍ່ເສີມຂະຫຍາຍວັດທະນະທຳ, ຮີດຄອງປະເພນີອັນດີງາມ, ເປັນການສືບທອດມໍລະດົກປະຫວັດສາດ ອັນສຳຄັນຂອງປະຊາຊົນລາວເຮົາ ທີ່ຕິດພັນກັບຄວາມເຊື່ອ, ຄວາມຮັກ ແລະ ບູຊາຕໍ່ຕົ້ນກຳເນີດຂອງພຸມລຳເນົາ, ລະນຶກເຖິງຄຸນງາມຄວາມດີຂອງບັນພະບູລຸດ ທີ່ໄດ້ສ້າງບ້ານແປງເມືອງໄວ້ໃຫ້ພວກເຮົາ ກ່ອນຈະມີວັນນີ້, ສ້າງສີສັນຄວາມເປັນມຸງຄຸນໃຫ້ແກ່ຊາຕາບ້ານເມືອງ ອັນເປັນຖິ່ນອາໄສຂອງປະຊາຊົນ.

2018-01-04

ປະຕິທິນ

Jan-2020
S M T W T F S
1 2 3 4
5 6 7 8 9 10 11
12 13 14 15 16 17 18
19 20 21 22 23 24 25
26 27 28 29 30 31

ລິຂະສິດ © 2015
ອົງການແນວລາວສ້າງຊາດສະຫງວນລິຂະສິດໄວ້ທັງໜົດ