ແນະນຳ ສນຊ (LFND)

ທ່ານປະທານສູນກາງແນວລາວສ້າງຊາດ ຕ້ອນຮັບຜູ້ແທນຄົນເຊື້ອຊາດລາວ ທີ່ອາໄສຢູ່ຕ່າງປະເທດ

          ວັນທີ 05 ມັງກອນນີ້ ທີ່ສູນກາງແນວລາວສ້າງຊາດ, ທ່ານ ໄຊສົມພອນ ພົມວິຫານ ກໍາມະການກົມການເມືອງສູນກາງພັກ ປະທານສູນກາງແນວລາວສ້າງຊາດ ໄດ້ຕ້ອນຮັບການເຂົ້າຢ້ຽມຂໍ່ານັບ ຂອງຄະນະຜູ້ແທນຄົນເຊື້ອຊາດລາວ ສັນຊາດ ການາດາ ເຊິ່ງນໍາພາໂດຍ ທ່ານ ພູເງິນ ສີອະໂນໄທ ກໍາມະການສູນກາງແນວລາວສ້າງຊາດ ຢູ່ປະເທດການາດາ;

ໃນໂອກາດເດີນທາງມາເຄື່ອນໄຫວຢ້ຽມຢາມ ແລະ ແຂ່ງຂັນກິລາບານເຕະມິດຕະພາບຢູ່ ສປປ ລາວ ໃນລະຫວ່າງ ວັນທີ 26 ທັນວາ 2017-08 ມັງກອນ 2018 ໂດຍມີບັນດາທ່ານຄະນະຜູ້ແທນຄົນເຊື້ອຊາດລາວ ຈາກ ປະເທດ ການາດາ ຈໍານວນ 50 ທ່ານ ເຊິ່ງມີຕາງໜ້າກົມພົວພັນຄົນເຊື້ອຊາດລາວຢູ່ຕ່າງປະເທດ ຂອງກະຊວງການຕ່າງປະເທດ, ຄະນະທີ່ປຶກສາຄົນເຊື້ອຊາດລາວຂອງ ສນຊ, ​ບັນດາທ່ານຫົວໜ້າກົມ, ຫ້ອງການ, ສູນຝຶກອົບຮົມ ສນຊ ເຂົ້າຮ່ວມ.

          ໃນພິທີ, ໄດ້ຮັບຟັງການລາຍງານຈຸດປະສົງການມາຢ້ຽມຢາມປະເທດລາວໃນຄັ້ງນີ້ ຈາກທ່ານ ພູເງິນ ສີອະໂນໄທ ທ່ານໄດ້ກ່າວວ່າ: ການເຄື່ອນໄຫວຂອງຄະນະຄັ້ງນີ້ ຖືເປັນຄັ້ງທໍາອິດທີ່ເປັນຄະນະໃຫຍ່ ແລະ ເປັນທາງການ ເຊິ່ງຄະນະໄດ້ເຂົ້າຢ້ຽມຂໍ່ານັບການນໍາຂັ້ນສູງຂອງ ສປປ ລາວ, ເຂົ້າຮ່ວມແຂ່ງຂັນກິລາບານເຕະມິດຕະພາບລະຫວ່າງ ຄະນະສະມາຄົມກິລາບານເຕະລາວ ແຂວງ ເກເບັກ ປະເທດ ການາດາ ສະມາຄົມວິທິສໍາພັນ, ສະໂມສອນລ້ານຊ້າງ ແລະ ກະຊວງສຶກສາທິການ ແລະ ກິລາ, ຢ້ຽມຊົມສະຖານທີ່ຕ່າງໆ ຢູ່ນະຄອນຫຼວງວຽງຈັນ ແລະ ແຂວງ ຈໍາປາສັກ.  ທ່ານ ກ່າວຕື່ມວ່າ:​ ຄະນະພວກຂ້າພະເຈົ້າມີຄວາມຮູ້ສຶກດີໃຈຫຼາຍ ທີ່ໄດ້ມີໂອດາດກັບຄືນມາຢ້ຽມຢາມບ້ານເກີດເມືອງນອນບ່ອນຝັງສາຍແຮ່ແຜ່ບື ແລະ ເປັນແຜ່ນດິນແມ່.

          ໃນໂອກາດດັ່ງກ່າວ, ທ່ານປະທານ ສນຊ ໄດ້ເປັນກຽດໂອ້ລົມວ່າ: ​ກ່ອນອື່ນທ່ານໄດ້ສະແດງຄວາມຊົມເຊີຍຕໍ່ຄະນະຄົນເຊື້ອຊາດລາວ ສັນຊາດການາດາ ທີ່ມີຫຼາຍໆທ່ານເດີນທາງກັບມາຢ້ຽມຢາມບ້ານເກີດເມືອງນອນຂອງຕົນເປັນເທື່ອທໍາອິດ ທ່ານກ່າວວ່າ: ຕະຫຼອດ 40 ກວ່າປີ ທີ່ ສປປ ລາວ ໄດ້ຮັບການປົດປ່ອຍຢ່າງສົມບູນ ແລະ ພ້ອມກັນປົກປັກຮັກສາ ແລະ ພັດທະນາປະເທດຊາດ. ປັດຈຸບັນໄດ້ເປີດປະຕູສູ່ພາຍນອກ ເຮັດໃຫ້ເສດຖະກິດມີການເຕີບໂຕຢ່າງຕໍ່ເນື່ອງ. ການພັດທະນາແຕ່ລະຂົງເຂດຂະແໜງວຽກງານເປັນຕົ້ນ: ການສຶກສາ, ສາທາລະນະສຸກ, ຄົມມະນາຄົມ, ພະລັງງານ-ບໍ່ແຮ່, ກະສິກໍາ, ພື້ນຖານອຸດສາຫະກໍາ, ວຽກງານຖະແຫຼງຂ່າວ-ໂຄສະນາ, ການທ່ອງທ່ຽວ ແລະ ການພົວພັນ ລ້ວນແຕ່ໄດ້ຮັບການຂະຫຍາຍຕົວຢ່າງແຂງແຮງ ແລະ ກວ້າງຂວາງ; ລາຍຮັບສະເລ່ຍຫົວຄົນຕໍ່ປີນັບມື້ເພີ່ມຂຶ້ນ. ພ້ອມກັນນີ້, ທ່ານຍັງໄດ້ຫວນຄືນຄວາມເປັນມາຂອງອົງການແນວລາວສ້າງຊາດທີ່ຜ່ານ 3 ໄລຍະປະຫວັດສາດ, ທີ່ຕັ້ງ-ພາລະບົດບາດ ແລະ ໜ້າທີ່ຫຼັກ. ຈາກນັ້ນ ທ່ານປະທານ ສນຊ ກໍ່ໄດ້ຮຽກຮ້ອງເຊີນຊວນ ໃຫ້ຄະນະຄົນເຊື້ອຊາດລາວ ສັນຊາດການາດາ ຈົ່ງພາກັນປະກອບສ່ວນ ໃນການມາຢ້ຽມຢາມ, ທ່ອງທ່ຽວ, ໂຄສະນາເຜີຍແຜ່ ແລະ ພັດທະນາປະຂອງພວກເຮົາ, ພິເສດປີ 2018 ແມ່ນປີທ່ອງທ່ຽວລາວ ສະນັ້ນ ຂໍເຊີນຊວນພີ່ນ້ອງ ມາທ່ອງທ່ຽວປະເທດລາວ.

          ການພົບປະໂອ້ລົມຄັ້ງນີ້ ຍັງໄດ້ແລກປ່ຽນຄວາມຄິດຄວາມເຫັນ ແລະ ສົນທະນາບັນຫາຕ່າງໆ ຕໍ່ການໄປມາຫາສູ່ກັນ ຢ່າງກົງໄປກົງມາຕື່ມອີກ.

 

2018-01-09

ປະຕິທິນ

Jan-2020
S M T W T F S
1 2 3 4
5 6 7 8 9 10 11
12 13 14 15 16 17 18
19 20 21 22 23 24 25
26 27 28 29 30 31

ລິຂະສິດ © 2015
ອົງການແນວລາວສ້າງຊາດສະຫງວນລິຂະສິດໄວ້ທັງໜົດ