ແນະນຳ ສນຊ (LFND)

ສະຫຼຸບຖອດຖອນບົດຮຽນວຽກງານສາສະໜາໜຶ່ງປີຜ່ານມາ ແລະ ທິດທາງແຜນການໃນປີຕໍ່ໜ້າ

          ໃນວັນທີ 15 ມັງກອນ 2018, ທີ່ສູນກາງແນວລາວສ້າງຊາດ (ສນຊ) ກົມສາສະໜາໄດ້ເປີດກອງປະຊຸມສະຫຼຸບຖອດຖອນບົດຮຽນວຽກງານສາສະໜາ ປະຈໍາປີ 2017 ແລະ ທິດທາງແຜນການ ປີ 2018 ຢ່າງເປັນທາງການ ໂດຍການ ເປັນປະທານຂອງ ທ່ານ ຈັນທະວົງ ແສນອາມາດມົນຕີ ຮອງປະທານ, ຜູ້ຊີ້ນໍາວຽກງານສາສະໜາ ສນຊ, ມີບັນດາທ່ານຫົວໜ້າ-ຮອງຫົວໜ້າກົມ, ຫ້ອງການ, ສູນຝຶກອົບຮົມ ສນຊ, ມີບັນດາທ່ານຜູ້ຕາງໜ້າຈາກກະຊວງພາຍໃນ, ແນວລາວສ້າງຊາດນະຄອນຫຼວງວຽງຈັນ, ຄະນະທີ່ປຶກສາວຽກງານສາສະໜາ ສນຊ, ບັນດາອາດuດການນໍາກົມສາສະໜາ ສນຊ ພ້ອມດ້ວຍພະນັກງານ-ລັດຖະກອນ ກົມສາສະໜາເຂົ້າຮ່ວມ.

          ກອງປະຊຸມຄັ້ງນີ້, ໄດ້ຮັບຟັງ ບົດສະຫຼຸບວຽກງານສາສະໜາປະຈໍາປີ 2017 ແລະ ທິດທາງແຜນການໃນປີຕໍ່ໜ້າ ຈາກທ່ານ ຄະນອງລິດ ສີສົມບູນ ຄະນະປະຈໍາ ສນຊ, ຫົວໜ້າກົມສາສະໜາ ມີບາງເນື້ອໃນດັ່ງນີ້: ໃນໄລຍະໜຶ່ງປີຜ່ານມາ ກົມສາສະໜາ ໄດ້ມີຜົນສໍາເລັດຫຼາຍດ້ານ ແລະ ຫຼາຍວຽກ ຕາມແຜນການວາງໄວ້ເປັນຕົ້ນ: ວຽກງານການເມືອງ-ແນວຄິດໃຫ້ພະນັກງານ-ສະມາຊິກພັກພາຍໃນກົມ ດ້ວຍການເອົາໃຈໃສ່ເຊື່ອມຊຶມເຜີຍແຜ່ບັນດາເອກະສານສໍາຄັນຕ່າງໆ, ທີ່ກ່ຽວຂ້ອງທາງດ້ານວິຊາສະເພາະ ເຮັດໃຫ້ພະນັກງານ-ລັດຖະກອນ ພາຍໃນກົມມີຄວາມຫ້າວຫັນຕໍ່ໜ້າທີ່ວຽກງານ ແລະ ມີຄວາມຮັບຜິດຊອບສູງ, ມີຄວາມອຸ່ນອ່ຽນທຸ່ນທ່ຽງ; ພ້ອມນັ້ນ, ຍັງໄດ້ເອົາໃຈໃສ່ຈັດຕັ້ງຜັນຂະຫຍາຍແນວທາງນະໂຍບາຍຂອງພັກ, ກົດໝາຍຂອງລັດ ແລະ ແຜນພັດທະນາເສດຖະກິດ-ສັງຄົມຂອງລັດ, ວຽກງານວິຊາສະເພາະ, ໄດ້ສໍາເລັດການຝຶກອົບຮົມວຽກງານການເມືອງ ໃຫ້ຄະນະນໍາທີ່ເປັນຄະນະຮັບຜິດຊອບສາສະໜາຕ່າງໆຫຼາຍຄັ້ງ ແລະ ວຽກງານທີ່ພົ້ນເດັ່ນຂອງກົມໄດ້ສໍາເລັດການສ້າງຄູ່ມືຝຶກອົບຮົມວຽກງານສາສະໜາ, ການເຊື່ອມຊຶມວຽກງານ ການເມືອງ-ແນວຄິດ ໃຫ້ຄະນະຮັບຜິດຊອບສາສະໜາຕ່າງໆ, ສາສະໜາພຸດ, ການຈັດພິທີແລກປ່ຽນສະແດງສິລະປະ-ວັດທະນະທໍາ ຂອງບັນດາສາສະໜາ (ເປັນກິດຈະກໍາສ້າງຄວາມສາມັກຄີຂອງບັນດາການຈັດຕັ້ງສາສະໜາໃນ ສປປ ລາວ, ວຽກງານການຕ່າງປະເທດໄດ້ສໍາເລັດການເຂົ້າຮ່ວມກອງປະຊຸມສໍາມະນາ, ຝຶກອົບຮົມ ແລະ ຢ້ຽມຢາມຕ່າງປະເທດຫຼາຍປະເທດ, ໄດ້ສໍາເລັດການຕ້ອນຮັບຄະນະຜູ້ແທນພະສົງຫຼາຍຄັ້ງ ພ້ອມກັນນີ້ຄຽງຄູ່ກັບດ້ານດີກໍ່ຍັງມີຂໍ້ຄົງຄ້າງເປັນຕົ້ນ ການແກ້ໄຂສະພາບການສາສະໜາທີ່ເກີດຂຶ້ນຢູ່ບາງແຂວງ, ເມືອງ ແລະ ບ້ານ ຍັງຊັກຊ້າ, ຍັງມີນັກບວດ-ນັກເທດສາສະໜາຈໍານວນໜຶ່ງ ທີ່ເຄື່ອນໄຫວບໍ່ສອດຄ່ອງກັບແນວທາງນະໂຍບາຍຂອງພັກ-ນິຕິກໍາຂອງລັດ ເປັນຊ່ອງວ່າງໃຫ້ຄົນບໍ່ດີສວຍໃຊ້ສາສະໜາ ເພື່ອແບ່ງແຍກຄວາມສາມັກຄີ. ສ່ວນທິດທາງ ແລະ ແຜນການໃນປີຕໍ່ໜ້າ ສືບຕໍ່ຜັນຂະຫຍາຍນິຕິກໍາຕ່າງໆໃຫ້ທ້ອງຖິ່ນ ໂດຍສະເພາະແມ່ນພະນັກງານທີ່ເຮັດວຽກງານສາສະໜາໃຫ້ມີຄວາມເຂົ້າໃຈຢ່າງເລິກເຊິ່ງໃນການໄກ່ເກ່ຍແກ້ໄຂບັນຫາທີ່ກ່ຽວຂ້ອງ ໃນທົ່ວປະເທດໃຫ້ມີຄວາມສະຫງົບ, ສອດຄ່ອງກັບສະພາບຕົວຈິງຂອງແນວທາງນະໂຍບາຍ, ລະບຽບກົດໝາຍຂອງບ້ານເມືອງ ພ້ອມທັງຄົ້ນຄວ້າຜັນຂະຫຍາຍສັນຍາຮ່ວມມືກັບບັນດາອົງການທັງພາຍໃນ ແລະ ຕ່າງປະເທດ ພ້ອມກັນນີ້, ບັນດາທ່ານຜູ້ເຂົ້າຮ່ວມກອງປະຊຸມຍັງໄດ້ແລກປ່ຽນຄໍາຄິດ-ຄໍາເຫັນຢ່າງກົງໄປກົງມາກ່ຽວກັບວຽກງານສາສະໜາຕ່າງໆ.

ໃນໂອກາດດຽວກັນນີ້, ທ່ານ ຈັນທະວົງ ແສນອາມາດມົນຕີ ໄດ້ເນັ້ນໜັກບາງເນື້ອໃນຕື່ມວ່າ: ກ່ອນອື່ນໝົດຂໍສະແດງຄວາມຍ້ອງຍໍຊົມເຊີຍຕໍ່ຜົນສໍາເລັດທີ່ກົມສາສະໜາ ສນຊ ຍາດໄດ້ໃນໄລຍະໜຶ່ງປີຜ່ານມາເປັນຕົ້ນແມ່ນກົມສາສະໜາ, ໄດ້ເປັນເສນາທິການໃຫ້ແກ່ຄະນະພັກ-ຄະນະປະຈໍາ ສນຊ ໃນການເຕົ້າໂຮມຄວາມສາມັກຄີປອງດອງບັນດາການຈັດຕັ້ງສາສະໜາ ແລະ ສາສະນິກະຊົນ ທີ່ເຊື່ອຖືໄດ້ຢ່າງກວ້າງຂວາງ ໂດຍພື້ນຖານແລ້ວມີຄວາມສະຫງົບດີ ແລະ ທ່ານຍັງຮຽກຮ້ອງມາຍັງບັນດາສາສະໜາຕ່າງໆຈົ່ງພ້ອມກັນເປັນເຈົ້າການ ມີສະຕິລະວັງຕົວຕໍ່ການເຄື່ອນໄຫວຂອງກຸ່ມຄົນທີ່ບໍ່ຫວັງດີສວຍໃຊ້ວຽກງານ ສາສະໜາ ເພື່ອແບ່ງແຍກຄວາມສາມັກຄີຂອງປະຊາຊົນລາວບັນດາເຜົ່າ.

2018-01-17

ປະຕິທິນ

Jan-2020
S M T W T F S
1 2 3 4
5 6 7 8 9 10 11
12 13 14 15 16 17 18
19 20 21 22 23 24 25
26 27 28 29 30 31

ລິຂະສິດ © 2015
ອົງການແນວລາວສ້າງຊາດສະຫງວນລິຂະສິດໄວ້ທັງໜົດ