ແນະນຳ ສນຊ (LFND)

ທ່ານ ປະທານສູນກາງແນວລາວສ້າງຊາດ ພົບປະນາຍ ແລະ ພົນທະຫານ ວິທະຍາຄານ ເຕັກນິກການທະຫານ ແລະ ກອງພັນໃຫຍ່ 661

          ເນື່ອງໃນໂອກາດວັນສ້າງຕັ້ງກອງທັບປະຊາຊົນລາວ ຄົບຮອບ 69 ປີ ( 20 ມັງກອນ 1949-20 ມັງກອນ 2018) ທ່ານ ໄຊສົມພອນ ພົມວິຫານ ກຳມະການກົມການເມືອງສູນກາງພັກ, ປະທານສູນກາງແນວລາວສ້າງຊາດ ໄດ້ເຄື່ອນໄຫວຢ້ຽມຢາມພົບປະໂອ້ລົມນາຍ ແລະ ພົນທະຫານ ຢູ່ ວິທະຍາຄານ ເຕັກນິກການທະຫານ ກະຊວງປ້ອງກັນປະເທດ ໂດຍມີທ່ານ ພົນຈັດຕະວາ ຄອນສະ ຫວັນ ມິ່ງຈໍາປາບານ ຮອງຫົວໜ້າກົມໃຫຍ່ເຕັກນິກກອງທັບ, ມີຄະນະພັກ, ຄະນະບັນຊາ, ນາຍ ແລະ ພົນທະຫານ ຂອງວິທະຍາຄານເຕັກນິກການທະຫານ ແລະ ກອງພັນໃຫຍ່ 661 ເຂົ້າຮ່ວມ ໃນວັນທີ່ 16 ມັງກອນ 2018,

          ທ່ານ ພັນໂທ ຈັນສະໝອນ ລັດສະໄໝ ຮອງອໍານວຍການ, ຫົວໜ້າຫ້ອງອົບຮົມ ວິທະຍາຄານເຕັກນິກການທະຫານໄດ້ລາຍງານສະພາບຈຸດພິເສດ, ຜົນງານການເຄື່ອນໄຫວໄລຍະຜ່ານມາ ແລະ ທິດທາງອົບຮົມ-ກໍ່ສ້າງໃນຊຸມປີຕໍ່ໜ້າ ຂອງວິທະຍາຄານເຕັກນິກການທະຫານ ເຊິ່ງໃຫ້ຮູ້ວ່າ ວິທະຍາຄານເຕັກນິກການທະຫານ ແມ່ນໜຶ່ງໃນບັນດາວິທະຍາຄານຂອງກອງທັບປະຊາຊົນລາວ ຢູ່ພາຍໃຕ້ການຊີ້ນໍາ-ນໍາພາໂດຍກົງ ແລະ ຮອບດ້ານຂອງກະຊວງປ້ອງກັນປະເທດ, ໃຕ້ການຊີ້ນໍາ-ນໍາພາ, ຄຸ້ມຄອງ ຂອງກົມໃຫຍ່ເຕັກນິກກອງທັບ ເຊິ່ງມີພາລະບົດບາດ, ໜ້າທີ່ສຶກສາອົບຮົມ-ກໍ່ສ້າງ ແລະ ບໍາລຸງວິທະຍາສາດເຕັກນິກ ການທະຫານຮັບໃຊ້ກອງທັບ, ຄົ້ນຄວ້າວິທະຍາສາດ ເຕັກໂນໂລຊີໃນຂອບເຂດເຕັກນິກການທະຫານ, ອຸດສາຫະກໍາປ້ອງກັນຊາດ, ນໍາໃຊ້ເຕັກໂນໂລຊີເຂົ້າສູ່ການປະຕິບັດຕົວຈິງ ໂດຍສົບທົບການກໍ່ສ້າງຢູ່ພາຍໃນ ແລະ ຕ່າງປະເທດ; ສ້າງແຜນການກໍ່ສ້າງພະນັກງານວິທະຍາສາດເຕັກນິກ ໃນແຕ່ລະໄລຍະ, ຄົ້ນຄວ້ານໍາໃຊ້ວິທະຍາສາດເຕັກໂນໂລຊີການທະຫານ ເຂົ້າຮ່ວມບັນດາໂຄງການດັດແປງ, ອອກແບບພາຫະນະ ອາວຸດຍຸດໂທປະກອນຂອງກອງທັບຕາມໂຄງການກະຊວງປ້ອງກັນປະເທດ; ຄົ້ນຄວ້າອອກແບບນໍາໃຊ້ເຕັກໂນໂລຊີເຂົ້າໃນການຜະລິດ, ຊອກຄົ້ນນໍາໃຊ້ອາ ວຸດຍຸດໂທປະກອນເຕັກນິກ, ພາຫະນະຮັບໃຊ້ສູ້ຮົບ ແລະ ຝຶກອົບຮົມຢູ່ບັນດາກົມກອງໃນກອງທັບ; ປະຕິບັດລະບອບວຽກງານພັກ-ວຽກງານການເມືອງ ໃຫ້ຖືກຕ້ອງຄົບຖ້ວນຕາມລະບຽບການ, ສ້າງວິທະຍາຄານ ເຕັກນິກການທະຫານ ໃຫ້ມີຄວາມໜັກແໜ້ນທາງດ້ານການເມືອງ-ແນວຄິດ, ເຂັ້ມແຂງທາງດ້ານການຈັດຕັ້ງ ແລະ ມີວິໄນທີ່ເຂັ້ມງວດ ເພື່ອເຮັດສໍາເລັດທຸກໜ້າທີທີ່ໄດ້ຮັບມອບໝາຍ ຄຽງຄູ່ກັບການສ້າງຂະບວນການຕ່າງໆເຊັ່ນ: ຂະບວນການສ້າງກົມກອງໃຫ້ກາຍເປັນກອງຮາກຖານເຂັ້ມແຂງ-ຮູ້ນຳພາຮອບດ້ານ, ຂະ ບວນການເຄື່ອນໄຫວຮັກສາຄວາມສະຫງົບປອດໄພ, ຂະບວນກໍ່ສ້າງຮາກຖານການເມືອງ, ຂະບວນການປັບປຸງກຳລັງໃຫ້ມີຄວາມໜັກ ແໜ້ນເຂັ້ມແຂງທາງດ້ານປະລິນມານ ແລະ ຄຸນະພາບ, ຂະບວນການຈັດຕັ້ງປະຕິບັດ 4 ແຜນງານໃຫຍ່ 26 ໂຄງການທີ່ຄະນະພັກກະ ຊວງວາງອອກ.

          ໃນໂອກາດດັ່ງກ່າວ, ທ່ານ ໄຊສົມພອນ ພົມວິຫານ ໄດ້ກ່າວສະແດງຄວາມຍ້ອງຍໍຊົມເຊີຍ ແລະ ຕີລາຄາສູງຕໍ່ການປະຕິບັດໜ້າທີ່ຂອງ ວິທະຍາຄານ ເຕັກນິກການທະຫານ ແລະ ກອງພັນໃຫຍ່ 661 ຜ່ານການຮັບຟັງການລາຍງານຂອງຄະນະນຳ, ຄະນະບັນຊາເຫັນວ່າການປະຕິບັດໜ້າທີ່ວຽກງານວິຊາສະເພາະ, ວຽກງານປ້ອງກັນຊາດ-ປ້ອງກັນຄວາມສະຫງົບເຮັດໄດ້ດີສະແດງອອກເຖິງສະ ຖຽນລະພາບທາງດ້ານການເມືອງມີຄວາມສະຫງົບ, ສັງຄົມມີຄວາມສີວິໄລ, ເພີ່ມທະວີຄວາມສາມັກຄີພາຍໃນເປັນປຶກແຜ່ນແໜ້ນໜາ, ເສີມຂະຫຍາຍຈິດໃຈເປັນເຈົ້າຂອງປະເທດຊາດເຊື່ອມຊຶມທັດສະນະເພິ່ງຕົນເອງ, ກຸ້ມຕົນເອງ ແລະ ສ້າງຄວາມເຂັ້ມແຂງດ້ວຍຕົນເອງ; ພ້ອມກັນນັ້ນ, ທ່ານປະທານສູນກາງແນວລາວສ້າງຊາດຍັງໄດ້ຍົກໃຫ້ເຫັນສະພາບການຂອງໂລກ, ພາກພື້ນ ແລະ ພາຍໃນປະເທດມີການຜັນແປໄປຢ່າງສັບສົນໄວວາ ພ້ອມທັງຍົກໃຫ້ເຫັນປະຫວັດມູນເຊື້ອ, ພາລະບົດບາດ, ໜ້າທີ່ຂອງແນວລາວສ້າງຊາດ, ພ້ອມດຽວກັນນັ້ນກໍ່ໄດ້ຮຽກຮ້ອງມາຍັງບັນດາສະຫາຍ ຈົ່ງພ້ອມກັນສືບຕໍ່ຮັກສາມູນເຊື້ອຜົນງານການຈັດຕັ້ງປະຕິບັດໜ້າທີ່ວຽກງານໃຫ້ຫລາຍກວ່າເກົ່າ ເພື່ອສ້າງກົມກອງແຂງ-ຮູ້ນຳພາຮອບດ້ານ ຕາມແນວທາງນະໂຍບາຍຂອງພັກ-ລັດ ຢ່າງແທ້ຈິງ, ເພີ່ມທະວີການເຮັດໜ້າທີ່ວຽກງານກໍ່ສ້າງການເມືອງຕິດພັນກັບການພັດທະນາເສດຖະກິດ-ສັງຄົມ, ເພີ່ມທະວີວຽກງານສຶກສາອົບຮົມການເມືອງແນວຄິດໃຫ້ນາຍ ແລະ ພົນທະຫານ ໃຫ້ມີຄວາມເຂົ້າໃຈຕໍ່ແນວທາງນະໂຍບາຍຂອງພັກ-ລັດ ໃນແຕ່ລະໄລຍະໃຫ້ມີແນວຄິດຫຼັກໝັ້ນ, ຊົນຊັ້ນມີຄວາມບໍລິສຸດສັດຊື່ ມີຄວາມຈົງຮັກພັກດີຕໍ່ພັກ ແລະ ປະເທດຊາດຕໍ່ປະຊາຊົນບັນດາເຜົ່າ, ມີສະຕິລະວັງຕົວຕໍ່ກົນອຸບາຍຫັນປ່ຽນຂອງສັດຕູ, ມີຄວາມເສຍສະຫຼະອັນສູງສົ່ງເພື່ອຊາດ ເພື່ອປະຊາຊົນຊົນ; ຕັ້ງໜ້າຝຶກຝົນຫຼໍ່ຫຼອມຕົນເອງ, ແກ້ໄຂບັນດາປະກົດການຫຍໍ້ທໍ້ຕ່າງໆ, ຍົກລະດັບຄຸນທາດການເມືອງ, ຄຸນສົມບັດສິນທໍາປະຕິວັດ, ວິທະຍາສາດ-ເຕັກນິກສູງຂຶ້ນ; ປົກປັກຮັກສາສິດເປັນເຈົ້າຂອງປະຊາຊົນໂຄສະນາປຸກລະດົມຂົນຂວາຍ, ເຕົ້າໂຮມຄວາມສາມັກຄີປະຊາຊົນບັນດາເຜົ່າເພື່ອພ້ອມກັນສ້າງສາພັດທະນາບ້ານຊ່ອງ ແລະ ປຸກລະ ດົມປະຊາຊົນໃນການເຮັດຫນ້າທີ່ປ້ອງກັນຊາດ-ປ້ອງກັນຄວາມສະຫງົບ ດັ່ງຄຳເວົ້າທີ່ວ່າ: ກອງທັບ ແລະ ປະຊາຊົນ ກໍ່ຄື “ປາກັບນໍ້າ” ແລະ ໃນໂອກາດເຄື່ອນໄຫວຢ້ຽມຢາມ ທ່ານ ໄຊສົມພອນ ພົມວິຫານ ໄດ້ມອບເງິນ ແລະ ເຄື່ອງກິລາຈໍານວນໜຶ່ງໃຫ້ວິທະຍາຄານເຕັກນິກການທະຫານ ແລະ ກອງພັນໃຫຍ່ 661; ນອກຈາກນັ້ນ, ໄດ້ທ່ຽວຊົມຫ້ອງຮຽນ ແລະ ຫໍພັກນັກຮຽນຂອງວິທະຍາຄານ ເຕັກນິກການທະຫານຕື່ມອີກ.

2018-01-17

ປະຕິທິນ

Jan-2020
S M T W T F S
1 2 3 4
5 6 7 8 9 10 11
12 13 14 15 16 17 18
19 20 21 22 23 24 25
26 27 28 29 30 31

ລິຂະສິດ © 2015
ອົງການແນວລາວສ້າງຊາດສະຫງວນລິຂະສິດໄວ້ທັງໜົດ