ແນະນຳ ສນຊ (LFND)

ກອງປະຊຸມຝຶກອົບຮົມວຽກງານແນວລາວສ້າງຊາດ

ສູນກາງແນວລາວສ້າງຊາດ(ສນຊ) ໄດ້ຈັດກອງປະຊຸມຝຶກອົບຮົມວຽກງານແນວລາວສ້າງຊາດ ໃຫ້ແນວລາວສ່້າງຊາດ 93 ບ້ານ ຂອງເມືອງ ໄຊເສດຖາ ແລະ ເມືອງສີສັດຕະນາກ ນະຄອນຫຼວງວຽງຈັນ ໃນວັນທີ 3-4 ທັນວາ 2019 ນີ້ ທີ່ສູນຝຶກອົບຮົມ ສນຊ, ໂດຍການເປັນປະທານຂອງ ທ່ານ ນາງ ຄຳຈັນ ພົມແສງສະຫວັນ ຮອງປະທານສູນກາງແນວລາວສ້າງຊາດ, ມີບັນດາທ່ານຕາງໜ້າແນວລາວສ້າງຊາດ ນະຄອນຫຼວງວຽງຈັນ, ມີສຳມະນາກອນຈາກແນວລາວສ້າງຊາດ 93 ບ້ານ ຂອງສອງເມືອງດັ່ງກ່າວເຂົ້າຮ່ວມ.

ກອງປະຊຸມຄັ້ງນີ້, ໄດ້ຮັບຟັງການເຜີຍແຜ່ກົດໝາຍວ່າດ້ວຍແນວລາວສ້າງຊາດ ສະບັບປັບປຸງ, ໄດ້ຮຽນຮູ້ຄວາມຮູ້ພື້ນຖານກ່ຽວກັບວຽກງານຊົນເຜົ່າ, ວຽກງານສາສະໜາ ແລະ ທັດສະນະຂອງພັກຕໍ່ວຽກງານສາສະໜາ, ຮຽນຮູ້ວຽກງານຊັ້ນຄົນ ແລະ ການຈັດຕັ້ງສັງຄົມ, ວຽກງານຫ້ອງການ, ວຽກງານໂຄສະນາຂົນຂວາຍ, ວຽກງານສ້າງຄອບຄົວ ແລະບ້ານສາມັກຄີປອງດອງ ຕິດພັນກັບການແກ້ໄຂຄວາມທຸກຍາກ ຂອງປະຊາຊົນບັນດາເຜົ່າ ແລະ ວຽກງານຕິດຕາມ ກວດກາຂອງແນວລາວສ້າງຊາດ. ພ້ອມກັນນີ້, ຜູ້ເຂົ້າຮ່ວມໄດ້ປະກອບຄຳຄິດຄຳເຫັນແລກປ່ຽນບົດຮຽນເຊິ່ງກັນ ແລະ ກັນ ຢ່າງກົງໄປກົງມາ ເຮັດໃຫ້ຜູ້ເຂົ້າຮ່ວມກອງປະຊຸມຄັ້ງນີ້ ສາມາດຮັບຮູ້ ແລະ ເຂົ້າໃຈຕໍ່ວຽກງານແນວລາວສ້າງຊາດໄດ້ຢ່າງເລິກເຊິ່ງ.
ທ່ານຮອງປະທານສູນກາງແນວລາວສ້າງຊາດ ໄດ້ມີຄຳເຫັນໂອ້ລົມຕໍ່ກອງປະຊຸມວ່າ: ໃຫ້ແນວລາວສ້າງຊາດເມືອງ ແລະ ບ້ານ ຈົ່ງເອົາໃຈໃສ່ ຄົ້ນຄວ້າເຊື່ອມຊຶມ ແລະ ກຳແໜ້ນພາລະບົດບາດ, ສິດ ແລະ ໜ້າທີ່ຂອງແນວລາວສ້າງຊາດ; ສຶກສາອົບຮົມ, ເຕົ້າໂຮມຄວາມສາມັກຄີປອງດອງປະຊາຊົນບັນດາເຜົ່າ, ປຸກລະດົມກຳລັງແຮງທົ່ວປວງຊົນເຂົ້າຮ່ວມຂະບວນການ ແລະ ກິດຈະກຳຕ່າງໆ ຂອງພັກ, ຂອງລັດ ໃຫ້ເປັນຂະບວນການຟົດຟື້ນ; ໂຄສະນາ ເຜີຍແຜ່ນ, ປາຖະກະຖາມູນເຊື້ອ, ວັນປະຫວັດສາດຕ່າງໆ ໃຫ້ກວ້າງຂວາງທົ່ວເຖິງ; ແນວລາວສ້າງຊາດຂັ້ນບ້ານ ທີ່ເປັນຜູ້ໃກ້ຊິດຕິດແທດ ກັບປະຊາຊົນ ຈົ່ງເພີ່ມທະວີຄວາມຮັບຜິດຊອບຕໍ່ວຽກງານຕິດຕາມກວດກາ ຂອງແນວລາວສ້າງຊາດ ໃຫ້ມີຄວາມເຂັ້ມແຂງຂຶ້ນຕື່ມ ໂດຍຮັບຟັງຄຳຄິດຄຳເຫັນ, ຄຳສະເໜີ ແລະ ຄວາມມຸ້ງມາດປາຖະໜາ, ຄວາມຂັດຂ້ອງໝອງໃຈ ຂອງປະຊາຊົນລາວບັນດາເຜົ່າ ແລະ ເສີມຂະຫຍາຍສິດເປັນເຈົ້າ ຂອງປະຊາຊົນ; ຈົ່ງປະກອບສ່ວນຢ່າງຕັ້ງໜ້າໃນການສະກັດກັ້ນປະກົດການຫຍໍ້ທໍ້ຕ່າງໆ ທີ່ເກີດຂຶ້ນໃນສັງຄົມ ໃຫ້ຫຼຸດນ້ອຍຖອຍລົງ, ໃຫ້ນຳເອົາບົດຮຽນທີ່ໄດ້ຝຶກອົບຮົມໃນຄັ້ງນີ້ ໄປໝູນໃຊ້ເຂົ້າສູ່ວຽກງານຕົວຈິງຢູ່ຂັ້ນທ້ອງຖິ່ນຮາກຖານຂອງຕົນ ເພື່ອເຮັດໃຫ້ວຽກງານແນວລາວສ້າງຊາດ ຢູ່ຂັ້ນບ້ານໄດ້ຮັບຜົນສຳເລັດດີຂຶ້ນເທື່ອລະກ້າວ.

2019-12-09

ປະຕິທິນ

Jan-2020
S M T W T F S
1 2 3 4
5 6 7 8 9 10 11
12 13 14 15 16 17 18
19 20 21 22 23 24 25
26 27 28 29 30 31

ລິຂະສິດ © 2015
ອົງການແນວລາວສ້າງຊາດສະຫງວນລິຂະສິດໄວ້ທັງໜົດ