ແນະນຳ ສນຊ (LFND)

ສູນກາງແນວລາວສ້າງຊາດ ປະກອບຄໍາເຫັນຕໍ່ກອງປະຊຸມສະພາແຫ່ງຊາດ

ໃນວາລະດໍາເນີນກອງປະຊຸມສະໄໝສາມັນເທື່ອທີ 8 ຂອງສະພາແຫ່ງຊາດ ຊຸດທີ VIII ພາຍໃຕ້ການເປັນປະທານ ຂອງທ່ານ ນ. ປານີ ຢ່າທໍ່ຕູ້ ກໍາມະການກົມການເມືອງສູນກາງພັກ ປະທານສະພາແຫ່ງຊາດ; ໃນວັນທີ 05 ທັນວາ 2019; ທ່ານ ນ. ຄໍາຈັນ ພົມແສງສະຫວັນ ຮອງປະທານສູນກາງແນວລາວສ້າງຊາດ ໄດ້ຕາງໜ້າສູນກາງແນວລາວສ້າງຊາດ ແລະ ອົງການຈັດຕັ້ງມະຫາຊົນຂັ້ນສູນກາງ ປະກອບຄໍາເຫັນຕໍ່ກອງປະຊຸມ.

ເຊິ່ງກ່ອນອື່ນ ທ່ານຮອງປະທານສູນກາງແນວລາວສ້າງຊາດໄດ້ໃຫ້ຮູ້ວ່າ: ສູນກາງແນວລາວສ້າງຊາດ ແລະ ບັນດາອົງ ການຈັດຕັ້ງມະຫາຊົນຂັ້ນສູນກາງ ແມ່ນເຮັດໜ້າທີ່ເປັນຕົວແທນສິດຜົນປະໂຫຍດອັນຊອບທໍາຂອງປະຊາຊົນ, ມີພາລະບົດ ບາດ ໃນການສຶກສາອົບຮົມ, ເຕົ້າໂຮມຄວາມສາມັກຄີປອງດອງປະຊາຊົນບັນດາເຜົ່າ-ຊັ້ນຄົນ, ສາສະໜາ, ເພດ-ໄວ, ປຸກລະດົມກໍາລັງແຮງຂອງມະຫາຊົນເຂົ້າຮ່ວມປະຕິບັດແນວທາງ, ນະໂຍບາຍຂອງພັກ, ກົດໝາຍຂອງລັດ, ແຜນພັດທະນາເສດຖະກິດສັງ ຄົມ ທັງມີບົດບາດໜ້າທີ່ໃນການຕິດຕາມ-ກວດກາ ການເຄື່ອນໄຫວຂອງສະມາຊິກສະພາແຫ່ງຊາດ, ສະພາປະຊາຊົນຂັ້ນແຂວງ, ຕາມທີ່ລະບຸໄວ້ໃນມາດຕາ 7 ຂອງລັດຖະທໍາມະນູນແຫ່ງ ສປປ ລາວ, ມາດຕາ 25, ມາດຕາ 90 ຂອງກົດໝາຍວ່າດ້ວຍສະພາແຫ່ງຊາດ ແລະ ມາດຕາ 8, ມາດຕາ 9 ຂອງກົດໝາຍວ່າດ້ວຍແນວລາວສ້າງຊາດສະບັບປັບປຸງ. ໂດຍປະຕິບັດຕາມພາລະບົດ ບາດ-ໜ້າທີ່ ທີ່ກ່າວມານັ້ນ ສູນກາງແນວລາວສ້າງຊາດ ແລະ ອົງການຈັດຕັ້ງມະຫາຊົນຂັ້ນສູນກາງໄດ້ເອົາໃຈໃສ່ ແລະ ຖືສໍາຄັນຕໍ່ການຕິດຕາມ-ກວດກາ, ຮັບຟັງຄໍາຄິດຄໍາເຫັນ, ຄໍາສະເໜີຂອງປະຊາຊົນຢູ່ທ້ອງຖີ່ນຕ່າງໆ ຕໍ່ການປະຕິບັດໜ້າທີ່ຂອງສະມາຊິກສະພາແຫ່ງຊາດ, ສະມາຊິກສະພາປະຊາຊົນຂັ້ນແຂວງ ແລະ ການປະຕິບັດບົດບາດໜ້າທີ່ຂອງອົງການບໍລິຫານ, ອົງການຕຸລາ ການ, ສານປະຊາຊົນ ໃນການຄຸ້ມຄອງລັດ, ຄຸ້ມຄອງສັງຄົມ, ການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ແລະ ການແກ້ໄຂຄໍາສະເໜີຂອງປະຊາຊົນ ທີ່ຜ່ານມາ ແຕ່ກໍ່ຍັງມີບາງຂໍ້ຄິດເຫັນຈາກຜູ້ມີສິດເລືອກຕັ້ງ ສະເໜີຕໍ່ສະພາແຫ່ງຊາດ, ສະ ມາຊິກສະພາແຫ່ງຊາດ, ສະພາປະຊາຊົນຂັ້ນແຂວງ ແລະ ອົງການບໍລິຫານ ເພື່ອພິຈາລະນາ ຊື່ງຂໍ້ຄິດເຫັນ ຈໍານວນໜື່ງກໍ່ຍັງຕິດພັນກັບບັນຫາທີ່ໄດ້ສະເໜີໃນປີຜ່ານມາແລ້ວເປັນຕົ້ນວ່າ:
1. ສະເໜີໃຫ້ສະມາຊິກສະພາແຫ່ງຊາດ, ສະພາປະຊາຊົນຂັ້ນແຂວງ ເພີ່ມທະວີການລົງພົບປະ ແລະ ໃກ້ສິດກັບປະຊາຊົນ ໂດຍສະເພາະແມ່ນປະຊາຊົນທີ່ຢູ່ເຂດຫ່າງໄກ-ທຸລະກັນດານຕື່ມ.
2. ຂໍໃຫ້ສະພາແຫ່ງຊາດ, ສະພາປະຊາຊົນຂັ້ນແຂວງ ເພີ່ມທະວີການຕິດຕາມ-ກວດກາ ໃນການປະຕິບັດໜ້າທີ່ຂອງສານ-ໄອຍະການໃຫ້ເຂັ້ມງວດກວ່າເກົ່າ ເປັນຕົ້ນແກ້ໄຂຕໍ່ພະນັກງານ ທີ່ຂາດຈັນຍາບັນ, ຈັນຍາທໍາ, ບໍ່ມີຄວາມໂປງໃສ່ ຕໍ່ໜ້າທີ່ຂອງຕົນ ໃນການຕັດສິນຂອງສານຕ້ອງຮັບປະກັນຖືກກົດໝາຍ ແລະ ຖືກກັບຄວາມເປັນຈິງໃຫ້ຫຼາຍຂື້ນ.
3. ສະເໜີໃຫ້ສືບຕໍ່ພິຈາລະນາຊົດເຊີຍໃຫ້ປະຊາຊົນທີ່ໄດ້ຮັບຜົນກະທົບຈາກໂຄງການພັດທະນາເສັ້ນທາງລົດໄຟລາວ-ຈີນຢູ່ບັນດາແຂວງທີ່ຍັງບໍ່ທັນສໍາເລັດ(ເງິນຊົດເຊີຍຊື້ເຂົ້າກິນເພາະປະຊາຊົນບໍ່ມີນາເຮັດ, ການຈັດສັນທີ່ຢູ່ອາໄສ) ແລະ ຜົນກະທົບຈາກໂຄງການພັດທະນາຢູ່ແຂວງອື່ນໆ.
4. ຂໍໃຫ້ລັດຖະບານ, ຂະແໜງການທີ່ກ່ຽວຂ້ອງທຸກພາກສ່ວນ ໄດ້ພິຈາລະນາຕໍ່ແຜນຍຸດທະສາດດ້ານພະລັງງານໄຟຟ້າຂອງລາວທີ່ຈະເປັນໝໍ້ໄຟຂອງອາຊຽນນັ້ນ ຫາງສຽງສັງຄົມໄດ້ສະເໜີວ່າ: ຍ້ອນມີຫຼາຍເຫດການເກີດຂຶ້ນໃນໄລຍະຜ່ານມາ (2-3ປີ) ລວມທັງບັນຫາໄພນໍ້າຖ້ວມເກີດຂຶ້ນໃນແຕ່ລະປີ ປະຊາຊົນເປັນຫ່ວງຢ້ານມີຄວາມສ່ຽງຫຼາຍດ້ານຈາກໂຄງ ການພັດທະນາໄຟຟ້າຊຶ່ງເຫັນວ່າການສ້າງເຂື່ອນໄຟຟ້າ, ຈໍານວນເຂື່ອນໄຟຟ້າມີຫຼາຍບາງແຂວງ ມີເຖິິງ 11 ແຫ່ງ, ບາງເມືອງ ມີເຖິງ 3 ແຫ່ງຂໍໃຫ້ພິຈາລະນາຄືນ.
5. ການຊຸກຍູ້ສົ່ງເສີມການຜະລິດເປັນສິນຄ້າ ເພື່ອແກ້ໄຂຄວາມທຸກຍາກໃຫ້ປະຊາຊົນ ຜ່ານມາພັກ-ລັດ ໄດ້ມີນະໂຍບາຍໃຫ້ປະຊາຊົນໄດ້ກູ້ຢືມເງິນທໍາການຜະລິດຕາມເງື່ອນໄຂຕົວຈິງແຕ່ສ່ວນຫຼາຍບໍ່ປະສົບຜົນສໍາເລັດ, ຫຼຸບທຶນຍ້ອນຫຼາຍສາ ເຫດ ແຕ່ສາເຫດຕົ້ນຕໍໜຶ່ງແມ່ນຍ້ອນບໍ່ມີຄວາມຮູ້, ຄວາມເຂົ້າໃຈດ້ານວິຊາການເຕັກນິກການປູກຝັງ, ລ້ຽງສັດ.... ຈຶ່ງຂໍສະເໜີໃຫ້ກະຊວງກ່ຽວຂ້ອງມີວິທີການ, ສົ່ງພະນັກງານຊ່ຽວຊານດ້ານກະສິກໍາໄປຊ່ວຍໃຫ້ຄໍາແນະນໍາ,ໄປນໍາພາປະຊາ
ຊົນໂດຍສະເພາະຕໍ່ຄອບຄົວ, ບ້ານ,ເມືອງທີ່ທຸກຍາກ.
6. ສະເໜີກະຊວງພາຍໃນພິຈາລະນາຕໍ່ຂະບວນການຂໍສ້າງຕັ້ງໃໝ່ ຫຼື ປັບປຸງການຈັດຕັ້ງສັງຄົມຍັງຜ່ານຫຼາຍຂອດແກ່ຍາວເວລາເກີນໄປຂໍໃຫ້ແຍກລະຫວ່າງສະມາຄົມຜູ້ປະກອບການທຸລະກິດກັບມູນນິທິທັງສອງປະເພດນີ້ນໍາໃຊ້ລະບຽບ, ຂັ້ນຕອນອັນດຽວກັນລວມທັງບັນຫາຕາປະທັບ ຜ່ານມາຍັງມີຄວາມຫຍຸ້ງຍາກ ຂໍໃຫ້ຄົ້ນຄ້ວາປັບປຸງຂັ້ນຕອນໃຫ້ສອດຄ່ອງຕົວຈິງຕື່ມ.
7. ຫາງສຽງຂອງປະຊາຊົນຕໍ່ການບໍລິການຮັບໃຊ້ປະຊາຊົນຂອງພະນັກງານ-ລັດຖະກອນ ແລະ ອົງການປົກຄອງບາງເມືອງຢູ່ບັນດາແຂວງ-ນະຄອນຫຼວງຈໍານວນໜຶ່ງ ຍັງເຮັດບໍ່ທັນໄດ້ດີສະແດງອອກ: ການຕ້ອນຮັບ, ການພົບປະປະຊາຊົນທີ່ມີບັນຫາສະເໜີ, ຂັດຂ້ອງໝອງໃຈຍັງມີລັກສະນະຕົວະແຂກລົງເຮືອນ, ຈໍານວນໜຶ່ງຈັນຍາບັນໃນການຮັບໃຊ້ປະຊາຊົນ
8. ການປະຕິບັດປີທ່ອງທ່ຽວ, ວຽກງານທ່ອງທ່ຽວຢູ່ລາວພວກເຮົາຍັງບໍ່ທັນກ້ວາງຂວາງ ບໍ່ທັນເປັນຄວາມຮັບຜິດຊອບຂອງທຸກພາກສ່ວນໃນສັງຄົມ, ມີແຕ່ພາກສ່ວນກ່ຽວຂ້ອງ ແລະ ຜູ້ປະກອບການເຮັດກໍບໍ່ໄດ້, ຄວນເອົາໃຈໃສ່ສ້າງຄວາມຮັບຮູ້, ການມີສ່ວນຮ່ວມຂອງທຸກພາກສ່ວນ, ປະຊາຊົນບັນດາເຜົ່າ ເພື່ອເຮັດໜ້າທີ່ປົກປັກຮັກສາເສີມຂະຫຍາຍມູນເຊື້ອວັດທະນະທໍາ, ການຜະລິດສະບຽງອາຫານ, ວຽກງານປ້ອງກັນ, ການໂຄສະນາດຶງດູດສ້າງສົນໃຈ ແລະ ຄວາມເຂົ້າໃຈໃຫ້ການທ່ອງ ທ່ຽວ, ການມາລົງທຶນຢູ່ລາວ, ສ້າງຄວາມເຂັ້ມແຂງໃຫ້ແກ່ການບໍລິການ, ຮັບໃຊ້ໃຫ້ດີທຽບທັນກັບບໍລິສັດທີ່ມາລົງທຶນວຽກງານດັ່ງກ່າວ.
9. ບັນຫາຫາງສຽງ, ການຊື້ຈ້າງເຂົ້າເປັນລັດຖະກອນ, ເປັນທະຫານ, ຕໍາຫຼວດ ຍັງມີຂໍ້ສະເໜີຫຼາຍບໍ່ທັນສາມາດສະກັດກັ້ນແກ້ໄຂໄດ້ ແລະ ມີຫາງສຽງຕໍ່ການໃຊ້ຈ່າຍເງິນເພື່ອໃຫ້ລູກທີ່ຮຽນຈົບມໍປາຍໄດ້ທຶນໄປຮຽນຕໍ່ຢູ່ຕ່າງປະເທດເປັນຈໍານວນຫຼາຍພັນໂດລາ ຂໍໃຫ້ມີການຕິດຕາມກວດກາຕື່ມ.
10. ການເກັບເງິນລົງທະບຽນຂອງນັກຮຽນຍັງມີຄໍາສະເໜີວ່າແພງ, ສະພາບນັກຮຽນປະລະການຮຽນ. ໂດຍສະເພາະ, ນັກ ຮຽນຊົນເຜົ່າຍັງມີຫຼາຍ ຍ້ອນສາເຫດການແຕ່ງງານກ່ອນໄວ, ສະພາບຄອບຄົວພໍ່ແມ່ບໍ່ມີອາຊີບແນ່ນອນ. ສະເໜີໃຫ້ຂະແໜງສຶກສາເອົາໃຈໃສ່ຕໍ່ຄຸນນະພາບການຮຽນ-ການສອນ. ໂດຍສະເພາະ, ເຂດຫ່າງໄກນັກຮຽນຈົບປະຖົມສ່ວນໜຶ່ງຍັງບໍ່ສາມາດອ່ານໜັງສືໄດ້ຄ່ອງໂຕ. ພ້ອມນີ້ກໍກວດກາຄືນ ແລະ ມີວິທີການແກ້ໄຂສະພາບປະຊາຊົນເຜົ່າຢູ່ເຂດຫ່າງໄກບໍ່ຮູ້ໜັງສືຈໍານວນໜຶ່ງ ລົບລ້າງແລ້ວກືກຄືນ, ບັນຫາດັ່ງກ່າວມີຄວາມຫຍຸ້ງຍາກຕໍ່ການພັດທະນາ.
11. ສະເໜີໃຫ້ກະຊວງແຮງງານ ແລະ ສະຫວັດດີການສັງຄົມ ແລະ ພາກສ່ວນທີ່ກ່ຽວຂ້ອງເອົາ ໃຈໃສ່ ຕິດຕາມ-ກວດກາ ການປະຕິບັດກົດໝາຍແຮງງານຂອງບໍລິສັດຕ່າງໆ ທີ່ມາລົງທຶນຢູ່ລາວໃຫ້ຖືກຕ້ອງ ເປັນຕົ້ນ: ການຈ້າງງານຍັງບໍ່ປະຕິບັດຕາມກົດໝາຍແຮງງານ, ບໍ່ທັນປະຕິບັດຄໍາແນະນໍາຂອງກະຊວງແຮງງານ ເພາະບາງໂຮງງານບໍ່ມີເຄື່ອງປ້ອງກັນສຸຂະພາບ ແລະ ຄວາມປອດໄພຂອງກໍາມະກອນ, ສະຖານທີ່ເຮັດວຽກຍັງບໍ່ເໝາະສົມ
12. ການປະຕິບັດໜ້າທີ່ຂອງແພດໝໍ, ຈັນຍາບັນຂອງແພດຈໍານວນໜຶ່ງ ໃນການບໍລິການຮັບໃຊ້ຄົນເຈັບຍັງບໍ່ທັນໄດ້ດີເທົ່າທີ່ຄວນ ໂດຍສະເພາະ ຕໍ່ຄົນເຈັບທີ່ໃຊ້ບໍລິການປະກັນສັງຄົມ, ຕໍ່ຜູ້ທີ່ຖານະເສດຖະກິດຕໍ່າ, ທຸກຍາກມາຈາກເຂດຫ່າງໄກ, ຊົນເຜົ່າ, ພະນັກງານບໍານານ-ເສຍອົງຄະ ຍັງມີຫາງສຽງຈົ່ມວ່າຫຼາຍ, ເວົ້າລວມ ຈັນຍາບັນຂອງແພດການປາກເວົ້າຂອງພະຍາບານຕໍ່ຄົນເຈັບ, ພໍ່ແມ່ຄອບຄົວຜູ້ມາເຝົ້າຄົນເຈັບເຫັນວ່າຍັງບໍ່ເໝາະສົມ, ຄວາມຮັບຜິດຊອບຕໍ່ຄົນເຈັບບໍ່ທັນສູງ, ການບົ່ງມະຕິພະຍາດຍັງຖືເບົາ ແລະ ບັນຫາອື່ນໆ. ຂໍໃຫ້ມີການປັບປຸງຢ່າງຕັ້ງໜ້າຕື່ມ.
13. ການສະກັດກັ້ນແກ້ໄຂບັນຫາຫຍໍ້ທໍ້ໃນສັງຄົມ (ອຸປະຕິເຫດຕາມທ້ອງຖະໜົນ, ຢາເສບຕິດ, ຂີ້ລັກ, ງັດແງະ ແລະ ການພະນັນ, ການຄຸ້ມຄອງຮ້ານກິນດື່ມບັນເທິງ, ໂສເພນີ, ຫຼິ້ນກິນຟຸມເຟືອຍ, ການຄຸ້ມຄອງຄົນເຂົ້າ-ອອກເມືອງ ແລະ ບັນ ຫາຫຍໍ້ທໍ້ໃໝ່ທີ່ເກີດຂຶ້ນຢູ່ໃນສັງຄົມຄືການມອມເຫຼົ້າ ແລະ ມອມຢາ ທີ່ເກີດຂຶ້ນຢູ່ຮ້ານບັນເທີງ.
14. ສະເໜີໃຫ້ປະຕິບັດກົດໝາຍວ່າດ້ວຍການຕ້ານການຄ້າມະນຸດ, ກົດໝາຍວ່າດ້ວຍການຕ້ານການໃຊ້ຄວາມຮຸ່ນແຮງຕໍ່ແມ່ ຍິງ-ເດັກ ຢ່າງເຂັ້ມງວດຕໍ່ຜູ້ເປັນແມ່ສື່ ພໍ່ສື່, ຜູ້ຄ້າຂາຍມະນຸດ, ຜູ້ທີ່ໃຊ້ຄວາມຮຸນແຮງ ຕໍ່ແມ່ຍິງ-ເດັກຍິງ.
15. ຕໍ່ການຕິດຕາມ-ກວດກາ ບັນຫາ ແຮງງານຂອງຄົນຕ່າງປະເທດ ທີ່ເຂົ້າມາເຮັດວຽກຢູ່ ສປປລາວ ບໍ່ທັນໄດ້ຮັບການແກ້ໄຂຢ່າງຕັ້ງໜ້າ ທັງຍັງມີທ່າອ່ຽງນັບມື້ ເພີ່ມຂຶ້ນຫຼາຍ. ພ້ອມກັນນີ້ຂໍໃຫ້ເອົາໃຈໃສ່ໃນການຕິດຕາມຕໍ່ແຮງງານຄົນລາວ ທີ່ໄປອອກແຮງງານຢູ່ຕ່າງປະເທດເພື່ອໃຫ້ເຂົາເຈົ້າມີຄວາມປອດໄພ, ບໍ່ຖືກຂູດຮີດແຮງງານ ເອົາລັດເອົາປຽບຄ່າຈ້າງ, ຍີ່ງໄປກວ່ານັ້ນມີຜູ້ຫາຍຕົວໄປ ກໍ່ມີ. ສໍາລັບແຮງງານ ທີ່ເຮັດວຽກຢູ່ ບໍລິສັດ, ໂຮງງານ, ຫົວໜ່ວຍທຸລະກິດ, ຄອບຄົວຢູ່ພາຍໃນປະເທດເຮົາ ຂໍໃຫ້ເອົາໃຈໃສ່ຕິດຕາມເຂົາເຈົ້າໄດ້ຮັບຄ່າແຮງງານ, ສະຫວັດດີການສັງຄົມຕາມກົດໝາຍແຮງງານຢ່າງຄົບຖ້ວນແທ້ ຫຼື ບໍ່.
ສູນກາງແນວລາວສ້າງຊາດ ຕາງໜ້າໃຫ້ໃຫ້ອົງການຈັດຕັ້ງມະຫາຊົນ ໄດ້ນໍາເອົາຄວາມເຫັນ, ຄໍາສະເໜີຂອງປະຊາຊົນບັນດາເຜົ່າມາສະເໜີຕໍ່ສະພາແຫ່ງຊາດ, ສະພາປະຊາຊົນຂັ້ນແຂວງ, ອົງການບໍລິຫານທຸກຂັ້ນ ເພື່ອຄົ້ນຄວ້າພິຈາລະນາແກ້ໄຂ, ໃຫ້ຄໍາຊີ້ແຈງຕໍ່ປະຊາຊົນຕາມທີ່ເຫັນສົມຄວນ ເພື່ອສ້າງຄວາມເຂົ້າໃຈ, ສ້າງຄວາມເຊື່ອໝັ້ນຂອງປະຊາຊົນຕໍ່ສະພາແຫ່ງຊາດ, ກໍ່ຄືຕໍ່ພັກ-ລັດພວກເຮົາ, ສ້າງໃຫ້ສັງຄົມມີຄວາມສະຫງົບ, ມີຄວາມສາມັກຄີປອງດອງ, ຍຸຕິທໍາ ແລະ ສີວິໄລ.

2019-12-13

ປະຕິທິນ

Jan-2020
S M T W T F S
1 2 3 4
5 6 7 8 9 10 11
12 13 14 15 16 17 18
19 20 21 22 23 24 25
26 27 28 29 30 31

ລິຂະສິດ © 2015
ອົງການແນວລາວສ້າງຊາດສະຫງວນລິຂະສິດໄວ້ທັງໜົດ