ແນະນຳ ສນຊ (LFND)

ຜົນສໍາເລັດຂອງການຝຶກອົບຮົມແລກປ່ຽນບົດຮຽນວຽກງານຂົນຂວາຍມະຫາຊົນ

ໃນວັນທີ່ 12 ທັນວາ 2019 ນີ້, ທີ່ສະຖາບັນການເມືອງແຫ່ງຊາດ ໂຮ່ຈີມິນ ສສ ຫວຽດນາມ ໄດ້ສຳເລັດຝຶກອົບຮົມວຽກງານຂົນຂວາຍມະຫາຊົນໃຫ້ພະນັກງານຫຼັກແຫຼ່ງຂອງແນວລາວສ້າງຊາດ, ອົງການຈັດຕັ້ງມະຫາຊົນຂັ້ນສູນກາງ, ແນວລາວສ້າງຊາດແຂວງ ແລະ ຂັ້ນເມືອງ ເຊິ່ງດໍາເນີນເປັນເວລາ 16 ວັນ ຝ່າຍລາວນໍາໂດຍທ່ານ ຈັນທະວົງ ແສນອາມາດມົນຕີ, ຮອງປະທານສູນກາງແນວລາວສ້າງຊາດ,ພ້ອມດ້ວຍສໍາມະນາກອນຈໍານວນ 34 ທ່ານໂດຍເປັນກຽດເຂົ້າຮ່ວມຂອງ ທ່ານ ບຸ່ນຕ໋ວນກວາງ ຮອງຫົວໜ້າຄະນະຂົນຂວາຍສູນກາງພັກກອມມູນິດຫວຽດນາມ,ມີຜູ້ຕາງໜ້າສະຖາບັນການເມືອງແຫ່ງຊາດໂຮ່ຈີມິນ, ຄະນະພົວພັນຕ່າງປະເທດສູນກາງພັກ, ຜູ້ຕາງໜ້າສະຖານທູດລາວປະຈໍານະຄອນຫຼວງຮ່າໂນ້ຍເຂົ້າຮ່ວມ.

ໃນໂອກາດນີ້, ທ່ານ ຈັນທະວົງ ແສນອາມາດມົນຕີ ໄດ້ມີຄໍາເຫັນຕໍ່ຊຸດຝຶກອົບຮົມ ເຊິ່ງກ່ອນອື່ນໝົດທ່ານໄດ້ສະແດງຄວາມຊົມເຊີຍຕໍ່ຜົນສໍາເລັດໃນຊຸດຝຶກອົບຮົມຄັ້ງນີ້, ເພື່ອເປັນການປະກອບສ່ອນອັນສໍາຄັນເຂົ້າໃນການເພີ່ມພູມຄູນສ້າງ ແລະ ເສີມຂະຫຍາຍສາຍພົວພັນມິດຕະພາບອັນຍິ່ງໃຫຍ່, ຄວາມສາມັກຄີພິເສດ ລະຫວ່າງສອງພັກ, ສອງລັດ ແລະ ປະຊາຊົນສອງປະເທດລາວ-ຫວຽດນາມຊຶ່ງແມ່ນປະທານ ໂຮ່ຈີມິນ ຜູ້ຍິ່ງໃຫຍ່, ປະທານ ໄກສອນ ພົມວິຫານ ແລະ ປະທານ ສຸພານຸວົງ ທີ່ແສນເຄົາລົບຮັກເປັນຜູ້ກໍ່ຕັ້ງ ແລະ ການນໍາຂອງສອງປະເທດຮຸ່ນຕ່າງໆໄດ້ພ້ອມກັນສືບທອດ ແລະ ປົກປັກຮັກສາ, ເພີ່ມພູນຄູນສ້າງ ແລະ ພັດທະນາຢ່າງບໍ່ຢຸດຢັ້ງທັງທາງກວ້າງ ແລະ ທາງເລິກຈົນກາຍເປັນມໍລະດົກລວມທີ່ລໍ້າຄ່າຂອງສອງປະເທດ, ເປັນກົດເກນແຫ່ງການຄົງຕົວ ແລະຂະຫຍາຍຕົວຂອງສອງປະເທດ, ເປັນໜຶ່ງໃນປັດໃຈຕັດສິນໄຊຊະນະຂອງພາລະກິດປະຕິວັດຢູ່ແຕ່ລະປະເທດເວົ້າລວມ, ເວົ້າສະເພາະ ແມ່ນການຈັດຕັ້ງຜັນຂະຫຍາຍສັນຍາຮ່ວມມືລະຫວ່າງຄະນະກໍາມະການສູນກາງແນວລາວສ້າງຊາດ ແລະ ຄະນະຂົນຂວາຍມະຫາຊົນສູນກາງພັກກອມມູນິດ ຫວຽດນາມ ໄລຍະປີ 2018-2022 ໃຫ້ນັບມື້ນັບເຂົ້າສູ່ລວງເລິກ, ລວງກວ້າງ ແລະ ແທດເໝາະກັບຕົວຈິງ; ການຝຶກອົບຮົມຄັ້ງນີ້ ລ້ວນແຕ່ມີຄວາມສໍາຄັນ ແລະ ມີປະໂຫຍດ ເຊິ່ງໄດ້ສ້າງຄວາມຮັບຮູ້ໃໝ່ຢ່າງເປັນລະບົບກ່ຽວກັບວຽກງານຂົນຂວາຍ, ໄດ້ຮູ້ຈັກຄວາມໝາຍຄວາມສໍາຄັນ ແລະ ພຶດຕິກໍາຕົວຈິງກ່ຽວກັບການຂົນຂວາຍຢູ່ແຕ່ລະຂົງເຂດວຽກງານ, ຂະແໜງການທັງຢູ່ສູນກາງ ແລະ ທ້ອງຖິ່ນ; ທີ່ສຳຄັນວຽກງານຂົນຂວາຍນັ້ນໄດ້ເຮັດໃຫ້ນັກສຳມະນາກອນໄດ້ຮັບຮູ້ວ່າວຽກງານຂົນຂວາຍນັ້ນແມ່ນວຽກງານທົ່ວລະບົບການເມືອງຂອງອົງການຈັດຕັ້ງພັກ-ລັດ, ອົງການປົກຄອງທຸກຂັ້ນ ແລະ ທົ່ວປວງຊົນບໍ່ແມ່ນພຽງແຕ່ ແນວໂຮມປະເທດຊາດ ຫວຽດນາມ ແລະ ຄະນະຄົນຂວາຍມະຫາຊົນສູນກາງພັກຄອມມູນນິດຫວຽດນາມເທົ່ານັ້ນ ເຊິ່ງພວກຂ້າພະເຈົ້າຈະໄດ້ນໍາເອົາບົດຮຽນຊຸດຝຶກອົບຮົມຄັ້ງນີ້ ນໍາໄປໝູນໃຊ້ເຂົ້າໃນຂົງເຂດວຽກງານຂອງຕົນຮັບຜິດຊອບໃຫ້ສອດຄ່ອງກັບສະພາບເງື່ອນໄຂຕົວຈິງຂອງແຕ່ລະອົງການຢູ່ສູນກາງ ແລະ ທ້ອງຖິ່ນ ໃຫ້ມີຜົນສໍາເລັດເປັນແຕ່ລະບາດກ້າວ.
ນອກຈາກນັ້ນຍັງໄດ້ທ່ຽວຊົມສະຖານທີ່ສໍາຄັນເປັນຕົ້ນ ສຸສານປະທານ ໂຮ່ຈີມິນ, ຫໍພິພິທະພັນໂຮ່ຈີມິນ, ຫໍພິພິທະພັນກອງທັບ; ຫໍພິພິທະພັນຊົນເຜົ່າວິທະຍາຫວຽດນາມ; ໄດ້ເດີນທາງໄປຢ້ຽມຊົມຈອມພູ ຝານຊີປັງ(Fanxipang) ແລະ ເບິ່ງວິທີການດໍາລົງຊີວິດຂອງປະຊາຊົນຊົນເຜົ່າມົ້ງຢູ່ບ້ານກັດກັດ ເມືອງສະປາ ແຂວງລາວກາຍ ແລະ ຍັງໄດ້ໄປທັດສະນະສຶກສາຢູ່ເມືອງໃໝ່ ອີໂກ້ພາກ(Ecopark) ແລະ ເອອ້ອນມໍ (Aeon Mall);ພິເສດຄະນະຊຸດຝຶກອົບຮົມຄັ້ງນີ້ຍັງໄດ້ຮັບກຽດເຂົ້າຢ້ຽມຂໍ່ານັບ ແລະແລກປ່ຽນບົດຮຽນນໍາ ສະຫາຍນາງ ເຈືອງ ທິ ມາຍ ກໍາມະການກົມການເມືອງສູນກາງພັກ,ເລຂາທິການສູນກາງພັກ,ຫົວໜ້າຄະນະຂົນຂວາຍປະຊາຊົນສູນກາງພັກຄອມມູນິດຫວຽດ ນາມຕື່ມອີກ.

2019-12-18

ປະຕິທິນ

Jan-2020
S M T W T F S
1 2 3 4
5 6 7 8 9 10 11
12 13 14 15 16 17 18
19 20 21 22 23 24 25
26 27 28 29 30 31

ລິຂະສິດ © 2015
ອົງການແນວລາວສ້າງຊາດສະຫງວນລິຂະສິດໄວ້ທັງໜົດ